Selos ug politika?

Kon wala mahulga ang Bando Osmeña Pundok Kauswagan (BOPK) sa huhungihong nga ang kapitan sa Barangay Mabolo nga si Niña Mabatid motapon ngadto sa oposisyon ug modagan pagka presidente sa Association of Barangay Council, nganong saba man kaayo sila?

Usa ra gyu’y naingnan nganong mituyhakaw ang libak-libak nga si Mabatid motapon ngadto sa PDP-Laban, kini mao ang estorya nga nakit-an si Bise Mayor Edgardo Labella sulod sa balay ni Mabatid atol sa pista sa ilang lugar.

Pero bisan si Mayor Tomas Osmeña ug mga kauban sa BOPK nasayod nga si Mabatid ug si Labella parehong taga Mabolo.     Aw, nganong wala man usab imbitaha ni Mabatid si Tomas?

Laing pangutana: unsa katinuod ang estorya nga si Konsehal Margot Osmeña, ang kapikas ni Tomas, dili ganahan ni Mabatid?

Nangutana ko nganong mitumaw ang estorya nga si Mabatid dili ganahan ni Margot, ug ang akong amigo miingon nga mas guwapa si Mabatid kay ni Margot ug mas bata ang kapitan ikomparar sa konsehala.

Nakakita hinuon ko og campaign poster ni Mabatid nga si Tomas ang tapad, ug lami kaayo og smile ang mayor. Tinuod ba nga aduna’y sagol selos?

Kutob ra gyud ko sa pangutana kay wala nato matugkad ang estorya tali ni Mabatid ug ni Tomas. Lisud ra ba kining politika nga masagolan og estorya sa selos.

* * *

Gikagubtan sa mga kritiko ang paghalok ni Presidente Rodrigo Duterte sa ngabil sa usa ka OFW nga nakapamana og Koreano, atol sa pagduaw sa presidente didto sa South Korea dili pa lang dugay.

Miabot kini sa punto nga nagkatinubagay sa social media sila si Kris Aquino ug Asec. Mocha Uson. Nagsugod kini sa dihang gi-post ni Mocha ang video sa presidente nga naghalok sa OFW ug ang video ni anhing senador Ninoy Aquino, amahan ni Kris, nga gihagkan sa ngabil sa mga babaye pipila ka gutlo sa wala pa siya patya sa Manila Airport.

Midemanda og pasaylo si Kris, pero nagmagahi si Mocha. Pero kagahapon, mismo si Presidente Duterte ang nangayo og pasaylo kang Kris.

Tan-awa ra gud, dali kaayo kitang makahuwes sa presidente sa iyang paghalok sa babaye nga klaro sa video nga misugot. Apan sa resulta niini nga nahimong away tali sa iyang loyal nga supporter nga si Mocha ug sa igsuon sa kanhi presidente nga karon lider sa oposisyon, ang presidente maoy nangayo og pasaylo, lahi kaayo kang Noynoy, igsuon ni Kris.

Kaniadto nga may pito ka Insik nga nangamatay sa makauulaw nga Quirino Grandstand hostage-taking, wala gyud mangayo’g pasaylo si Noynoy, hangtud karon. Pag-abot sa patay’ng lawas sa 44 ka SAF sa PNP human sa encounter sa Mamasapano, si Noynoy nag-drive-drive og virtual car.

Asa man makit-i ang malasakit?