Usa sa mga tahas ug responsibilidad sa atong gobiyerno ang paghatud sa batakang serbisyo. Apil sa pagtuman sa maong katungdanan ang pagpatukod og mga proyekto.
Apan wa ni nagpasabot nga katungdanan man sa mga opisyal sa gobyerno ang pagpatuman og proyekto nga ang ilang gusto ug kapritso maoy masunod.
Kinahanglang ipahaum sa unsa’y gikinahanglan sa publiko ang paghimo niini. Sentido kumon lang ang gikinahanglan ug dyutay’ng konsensiya sa mga opisyal ang importante aron masayran unsa’y labing haum nga mga proyekto ang gikinahanglan.
Karong bag-o duha ka proyekto sa lalawigan sa Sugbo ang nakadapit sa akong pagtagad. Una ang gitakdang pagtukod sa administrasyon ni Gobernador Hilario Davide III og bag-ong Kapitolyo nga mokantidad og P1.5 bilyones.
Ikaduha, ang tinguha nila nga mokuha sa serbisyo sa usa ka advertising agency sa kantidad nga P3.2 milyones aron kuno isangyaw ang mga programa sa probinsya.
Sa unang proyekto. Ang pangutana, kinahanglanon ba? Nag-opisina ba ang gobernador ug mga opisyal sa Kapitolyo ilawom sa kahoy aron mangutang sila og dakong kantidad aron magpatukod og bag-ong edipisyo?
Ang Kapitolyo sa Sugbo usa sa labing nindot nga mga buhatan sa gobiyerno sa tanang lalawigan sa nasud. Dili ni bentahaan sa desinyo.
Pero unsa’y ilang giapas komisyon sa proyekto?
Ang pundo nga giutang aron ipatukod niini, mas maayong gamiton sa mas mapuslanong proyekto, sama sa pagsiguro nga tarong ang kadalanan sa kabukiran aron mas sayon sa mga mag-uuma paghatud sa ilang abot ngadto sa merkado.
Usa pa ang National Historical Commission of the Philippines mipasidaan na diay’ng daan niadto pa nga miaging tuig nga dili mahimo ang pagtukod og ingon niini kataas nga edipisyo sulod sa Capitol compound, apan nganong miinsister ang mga opisyal sa Kapitolyo niini?
Sa ikaduhang proyekto, nganong kinahanglanon sa Kapitolyo ang advertising agency pagpahibawo sa ilang mga proyekto?
Wala kinahanglana nga usikan ang kwarta sa mga magbubuhis niini tungod kay regular ang coverage sa media diha sa mga buhatan sa Kapitolyo.
Gawas lang og dunay mga opisyal nga nagplano magtukod og advertising agency aron maoy mokobra sa P3.2M. Niining duha ka proyekto, sentro na sab si provincial administrator Mark Tolentino.
Sa akong tan-aw angayan na nga tangtangon ni Davide si Tolentino tungod kay daw sa nahimo na ning liability sa iyang administrasyon.