Migahin ang Kapitolyo og subra sa P3 milyones aron ibayad sa advertising agency nga maoy patrabahoon aron nindot og imahe ang Kapitolyo ubos sa administrasyon ni Gobernador Hilario Davide III. Ang gobernador mirason nga daghang proyekto ang nahimo sa iyang administrasyon sulod sa duha niya ka termino, apan wala kini masayri sa katawhan mao nga siya gisaway ug gipasanginlan nga wala’y nahimo.
Mag-usik lang og kuwarta ang Kapitolyo niining nahuna-hunaan sa gobernador. Adunay Public Information Office (PIO) ang probinsya nga ang mandato mao ang pagpahibalo sa publiko unsa ang mga nahimo sa Kapitolyo.
Kon wala man masayod ang katawhan sa daghan nga nahimo sa gobernador, nagpasabot lang kini nga wala magtrabaho ang iyang mga tawo sa PIO, busa tangtangon kini ug pulihan og mga tawo nga maayong motrabaho.
Wala na kinahanglana ang pagkuha og advertising agency kon ang tumong sa Kapitolyo mao lang ang pagpahumot ug pagpahibawo sa katawhan sa mga nahimo sa gobernador kay mahimo kini sa mga kawani sa PIO.
Kon tinuod man nga daghan og nahimo ang gobernador, mas labi pa nga wala na kinahanglana ang advertising agency kay ang mga tawo nga nakapahimulos sa mga programa ug proyekto mao na kini mismo ang mosabwag sa balita ngadto sa uban. Epektibo gihapon hangtud karon ang radyo-baba.
Daghan ang turista nga miadto sa isla sa Bantayan kay nangaligo sa dagat nga adunay sama sa asukal ka puti nga bas. Daghan ang miadto sa Basdako sa lungsod sa Moalboal kay nangaligo sa dagat nga may lapad ug puti usab nga bas.
Daghan usab ang miadto sa Bay Walk sa dakbayan sa Naga ug nanan-aw sa nindot nga talan-awon. Kining mga dapita gidugok sa mga tawo tungod sa estorya nga ilang nadunggan ug dili tungod kay gi-advertise kini. Nganong mag-usik man gyud og salapi nga aduna may libre.