EDITORYAL – Gahum sa usa ka boto

Adlaw karon sa paghukom. Ang mga yanong konstituwente sa barangay, dato man ug pobre, may gahum karon paghukom niadtong mga tawo nga nangambisyon og posisyon diha sa barangay sa ngalan sa panerbisyo. Apan nasayod ba kaha ang katawhan niini? Nasayod ba kaha sila kon unsa sila ka gamhanan karong adlawa?

Bisan kadtong mga yano, ug gani wala tagda sa katilingban, basta rehistrado ug makabotar karong adlawa, makonsiderar nga gamhanan ning mga orasa. Sa pag-adto ninyo karong adlawa sa presinto aron pagbotar, pilia gyud ang mga tarong nga kandidato. Balik-balika sa inyong mga hunahuna kon unsa’y nahimong maayo niining tawhana sa inyong lugar.

Sa mga nagpasubli sa katungdanan, balika ninyo og lantaw kon mitagad ba kini kaninyo ug miatiman sa inyong problema nga gisandig kanila. Tan-awa usab kon dili ba sila palaaway ngadto sa ilang mga kontra sa politika diha sa barangay. Kadtong kusog kaayong manaway ug mopasumbingay batok sa kontra, apan nasayod mo sa kamatuoran sa ilang binuhatan, hunahunaa pag-ayo kon angay pa ba silang pabalikon sa katungdanan.

Apila na lang usab ninyo pagsubay ang taras niining mga tawhana samtang sila nanerbisyo. Dili ba sila hambogero, mapahiubsanon ug matinahuron ba sila kaninyo ug sa inyong mga silingan? Kon wala mo makaila kanila sa personal, mas maayong magpangutana kamo sa mga silingan nga wala’y gidapigang kandidato, kay basin og ang nahinumdoman ninyo niining mga tawhana mao ra ang ilang mga pasalig nga kaayohan atol sa siyam ka adlaw nga pangampanya.

Ang ilang mga saad, dili pa igo nga basehan aron sila botaran. Labaw sa tanan, ayaw botari ang mga kandidatong mamalit og boto kay klaro na kaayo nga dili sila ligdong ug dili matinud-anon. Hinumdomi nga ang inyong “usa ka boto,” dako og matabang sa inyong barangay kon responsable kamo nga botante.