Maluoy sa masunogan

Nasayod kita nga daghang pamilya nga apil sa mga nasunogan og panimalay diha sa Barangay Ermita nalambigit sa panginabuhi nga ilegal, apan bisan pa sa ilegal nilang binuhatan, angay gihapon silang tabangan.

Sigurado ko nga dunay mga nasunogan nga namaligya og shabu, dunay nag-operate og video karera ug moli-moli kay nagkabuang man gani og aswat sa gambling machines aron dili maapil pagkasunog.

Pero nalipay gani ko nga giawhag ni Mayor Tomas Osmeña ang iyang mga sinaligan nga dalion ang pag-process sa mga dukomento aron kahatagan na og hinabang nga tag P20 mil, kadtong nanag-iya og panimalay nga nasunog, ug P10 mil sa mga nagpuyo lang.

Dili sayon nga mabiktima ka sa sunog kay mahurot ang imong kabtangan, ug lisud ka na nga makaangkon dayon niini. Mao nga nalipay ko nga nasayod nga si Presidente Duterte nagpakabana kaayo sa kahimtang sa mga nasunogan ug mipahatag og tabang. Gipadala gyud sa presidente dinhi sa Sugbo ang iyang special assistant nga si Christopher Lawrence “Bong” Go aron motunol sa hinabang ngadto sa mga nasunogan.

Gawas sa lainlaing butang nga kapahimuslan sa mga biktima sa sunog, gitunolan usab ni Bong Go ang kada pamilya og sobre nga may kuwarta sa sulod. Dihang gipangutana, wala motug-an si Go kon pila ang sulod. Mora’g wala siya magpasigarbo niini.

Apan ang mga reporters naghimo’g pakisusi sa mga gipanghatagan og sobre, ug nasuta nga tag P2,000 diay ang sulod sa sobre. Maayo na uy. Didto sa Manila, si Bong Go usab ang kanunay’ng moadto sa mga nasunogan ug mohatag og tabang.

Akong nasayran nga malooy gyud diay si Go sa mga nasunogan kay mao kini ang sagad niyang himoon kaniadto, bisan dihang executive assistant pa siya sa mayor sa Davao sa wala pa mapiling presidente si Duterte.

Dalaygon kaayo ang kinaiya sa tawo nga maantigong malooy sa mga biktima sa trahedya. Apan nasubo ko tungod kay dunay uban nga gibutangan nilang kolor ang kanunay’ng pag-adto ni Bong Go sa mga dapit nga nasunogan.

Namolitika kuno si Bong Go mao nga kanunay’ng mobisita sa mga nasunogan ug magpatuo nga naluoy. Kon tinuod pa kini, wala unta niya kini himoa kaniadto nga executive assistant pa siya sa mayor sa Davao?

Ang tinuod, isip special assistant to the president, siya maoy madali-dali pagsugo sa presidente kon dili kini makatambong sa usa ka kalihukan.

Sama gud sa pagtugyan sa P50 milyones nga pasiunang gahin sa Malasakit Program ni Presidente Duterte nga pag-atiman sa mga kabus nga lumolupyo nga manginahanglan og libreng pagpatambal. Nahinumdom mo nga si Bong Go man gihapon ang mitambong kay daghan og gitambongan si Duterte niadtong higayona.