Balaod sa kausaban
Bol-anon nga abogado ang nikumbinser sa Korte Suprema pagpasidungog sa Top 20, inay sa naandang Top 10 sa 2017 Bar Examinations.
Daghang nakugang sa mas taas nga lista nga gipagawas niadtong Huwebes sa Committee of Bar Examiners ni Associate Justice Lucas Bersamin.
Sa labing unang higayon karong tuiga, gipasidunggan sa Korte Suprema ang mga nakakuha sa 20 ka labing taas nga grado.
Mao ni ang hinungdan nga ang Sugbo nakaangkon og lima, dili lang tulo ka topnotchers:
Sila mao si Christianne Mae Balili (2) sa USC; Ivan D’laureil Hisoler (4) sa USC; Rheland Servacio (7) sa USC; Stephani Claros (15) sa USJR; ug Ella Mae Mendoza (17) sa UC.
* * *
Ang nakapakumbinser sa labaw’ng hukmanan paghimo sa kausaban mao si Atty. Thads Bentulan. Sa iyang suwat sa mga mahistrado sa Korte Suprema niadtong Disyembre 31, 2014, gipasabot ni Bentulan ang sugyot:
Ang Bar sa Pilipinas mahimong maoy labing lisud sa kalibutan tungod sa kalapad sa coverage ug sa kalisud sa mga pangutana nga giluwatan sa mga eksperto sa balaod nga matubag lang sa mga eksperto; ug
Ang Korte Suprema angay’ng magmanggihatagon sa iyang pasidungog kay ang mga nakapasar wa lang mopasundayag sa dinungan nga mastery sa walo ka subjects.
* * *
Ang 20 ka pahina nga suwat ni Bentulan, bisan wa pirmahi aron matuki ang mga sugyot, inay ang iyang personalidad, nipatumaw sa uban pa niyang gisugyot nga kausaban:
Pagtangtang sa multiple choice questions (MCQ) sugod sa Bar sa 2015 kay nakapataas sa pasulit ug nakapatumaw sa sayop nga pagtuo nga mas sayon na ang Bar; ug
Pagmantala sa comparative data sa matag subject sugod karong tuiga (unsa’y kinatas-an ug kinaubsang grado ug pila’y nakapasar, ug pila’y nahagbong sa unsang subject).
* * *
Dili pa abogado si Bentulan dihang nipadala sa suwat. Ambot napahibawo na ba sila si Chief Justice Maria Lourdes Sereno ug ubang mahistrado nga bag-o lang nilang nahatagan og lisensiya ang nihimo sa mga sugyot nga ilang gisagop.
Naguol hinuon ang mga higala ni Bentulan kon ang iyang mga kaso husayon na sa korte, kay dili man makapugong pagkuwestiyon sa mga lagda nga giisip nga dili makiangayon, ug nabalaka sila nga si Bentulan magkabulingit og contempt sa mga huwes nga dili malingaw sa iyang mga sugyot.
- Latest
