Pilia gyud ang mayo

Daghan sa mga gustong mahimong opisyal sa barangay, mipakita nga sila motrabaho gyud kon mapili sa katungdanan. Ang uban nanglimpyo sa mga kanal ug miayo sa mga pundir nga suga sa poste.

Kanindot kon ang gipakita nila mao gyud ang ilang himoon kon pananglit mapili sa eleksiyon karong Mayo 14. Ang kuyaw kon “pakitang tao” lang ang ilang gihimo.

Ang awhag nako sa mga botante, nga nakakita na man gyud mo sa mga opisyal karon diha sa inyong barangay, ayaw na ninyo botohe ang mga ligoy. Ang mga konsehal gibahin kana sila og mga distrito sa inyong barangay nga mao unta ang moatiman sa inyong problema.

Kon nakabantay mo nga pundir ang inyong mga suga ug wala gayud kini maatiman sa dugay na kaayong panahon, ang inyong konsehal nga gidistino sa distrito ug ang kapitan maoy mabasol.

Apil gyud kanunay ang kapitan kay kon nagtrabaho pa sila, kanunay nilang gipangitaan og report ang ilang mga konsehal. Wala man magpasabot nga sila gyud gani ang motrabaho kanunay sa mga gimbuhaton.

Mahimo nga sa ubang problema, sama sa pundir nga suga sa poste, sila lang maoy modala sa problema ngadto sa mga hingtungdang opisina sa City Hall aron mapulihan ang mga suga nga wala na magsiga.

Apan unsaon, kobra sa honorarium ra man ang nakamaohan sa uban. Bisan gani ang pagtambong sa sesyon sa ilang barangay dili usab magtingog. Ay naku!

* * *

Gisaway pag-ayo ang mga sakop sa PROBE team kay gipasanginlan nga gipangyabo kuno ang baligya sa usa ka sidewalk vendor nga ilang gidakop diha sa dalan Colon kaniadtong miaging Huwebes sa hapon.

Aw, kon miabuso gani ang mga sakop sa PROBE, awhagon nako ang maong sidewalk vendor nga moreklamo sa City Hall. Apan, dili tingali iyabo sa sakop sa PROBE kon wala la’y gihimo ang vendor.

Ang akong ikasulti niini ba, nganong anha man gyud kamo maninda diha sa karsada? Dili ba kadaghan na man nako kini gihisgotan dinhi sa atong lindog? Kanang karsada sa Colon gikan sa eskina Pelaez paingon na sa Colon eskina Osmeña Boulevard, dili na maagian ang aseras ug ang karsada, gitindahan pa gyud.

Asa na man lang paagia ang mga tawo, ug ang mga sakyanan? Kon maninda mo diha unya mangabot ang mga gitugyanan sa pagdakop kaninyo, ayaw pagdagan aron dili mangayabo ang inyong baligya.

Ang pagpaninda usa ka dalaygon kaayong matang sa panginabuhi, apan ayaw usab nga makahasol kamo sa uban.