Pagkaon nga makapa-samot sa panakit

Kon nagtagad, o naghatag pa lang kita og higayon nga makabaton og kahibalo sa pagbalanse sa atong kaonon, tingali dili kita magkasakit nga ugtason sa panakit ang atong lawas.

Unsaon, mao may nauso sa panahon, ang pagkaon sa lamian, dili ang sustansya nga makahimsog sa panglawas.

Unya kay nag-antos na man kita nga kanunay’ng nagmulo sa panakit ang lawas, gikinahanglan na gayud nga masayod kita sa mga pagkaon nga angay’ng likayan, aron dili mograbe ang atong sakit. Ania ang giya basin makatabang kini nga dili mosamot ang panakit sa imong lawas.

Kadaghanan sa mga tawo nga wa’y kontrol sa pagkaon, ang sagad masinati nga panakit mao ang kaunoran, kaugatan, lutahan, ug apil na niini ang kabukugan. Motumaw ang panakit nga magsugod sa bisan asa nga parte sa lawas, nga usa ra’y hinungdan, ug kini mao nga palyado na ang ubang sistema sa imong lawas.

Apan may paglaum pa nga maulian ang lawas gikan sa gumonhap sa pagkasakit, kon sugdan nato ang pagdisiplina sa kaugalingon, pinaagi sa paglikay sa mga pagkaon nga lami, apan makadaot sa lawas.

* Asukar — Matud pa sa mga hinam-is, mao na ni ang naandan nila nga ang katam-is maoy usa sa pampagana ug maghatag og enerhiya. Halos tanang produkto, may nagpahipi nga tam-is, nga gisagol sa aslom ug parat, sama sa mga sitsirya, pakete, o binotelyang pang-snaks.

Adunay asukar nga dili tam-is, sama sa ‘carbohydrates’ nga ang lawas na maoy moprodyus og asukar para gamiton nga enerhiya, o kusog sa lawas. Apan kon maghinubra niini, imbes moabtik, magkaluya hinuon ug masakit og diabetes kay ang asukar, wa magamit nga enerhiya, ug nagpundo lang sa dugo, mao nga ang uban mag-injection na og ‘insulin.’ aron idugang sa nagkamenos na nga insulin sa lawas.