Dili mopahawa ang gipapuyo sa yuta

Dear Atty. Divine,

Ang akong mama duna’y na-inherit nga yuta sa ilang probinsya. Iya kining napatitulohan og nakapangalan na kini sa akong inahan. Apan tungod kay naa mi sa siyudad nagpuyo, misugot ang akong mama nga motukod og balay sa maong luna ang iyang pag-umangkon.

Nagsabot sila nga sa panahon nga gamiton na ni mama ang property, boluntaryo nga mopahawa sa maong luna ang pamilya sa iyang pag-umangkon. Niadtong miaging tuig namatay ang akong mama ug tungod kay dako mi og nagasto sa pagka hospital sa akong mama, nakadesisyon mi nga mga igsuon nga ibaligya ang yuta ni mama aron ipamayad sa among utang.

Tungod niini, among gipadad-an og notice to vacate ang among paryente nga nagpuyo kay amo na nga ibaligya ang property apan nagdumili kini sa pagpahawa. Nag-atubang na mi sa barangay apan mi-insister sila nga dunay katungod nga mopuyo sa among yuta kay iya na daw kining napalit gikan ni mama kaniadto apan wa siya’y gipakitang Deed of Sale.  Ang akong pangutana kon mobarug ba sa korte ang claim sa akong ig-agaw sa maong yuta? Unsay angayan namo nga buhaton? — Marilou

Dear Marilou,

Kon wa siya’y ikapakita nga notarized documents nga pirmado sa imong mama, hayan dili makabarug sa korte ang claim sa imong ig-agaw. Kini tungod kay ang imong mama mao man ang nakapangalan sa title.

Kinahanglan nga probahan niya sa korte kon tinuod ba nga napalit niya ang maong yuta gikan sa imong mama pinaagi sa pagpresentar og mga dokumento. Ang maayo nimong buhaton mao ang pagkuha og Certificate to File Action sa barangay ug dayon mopasaka ka og ejectment case batok sa imong ig-agaw ngadto sa korte. Thanks and God bless.- Atty. Divine

* * *

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo