Nanglaktod kay nagduda sa Senado

Sa pag-ulbo sa iyang kasuko batok ni Chief Justice Maria Lourdes Sereno, duha ka pagpakaaron-ingnon sa iyang pamunoan ang nahukasan:

Una, kon basehan ang kamasuk-anon sa iyang panghimaraot nga kaduha gani niya hudlata nga sikaran ang babayeng Chief Justice, iya gyud diay’ng gipaluyohan, kon wa man gipasiugdahan, ang pagpalagpot ni Sereno sa katungdanan; ug

Ikaduha, kon basehan ang kasayon ra niyang niapura nilang House Speaker Pantaleon Alvarez sa impeachment ni Sereno, mga itoy ra gyud diay niya ang mga kongresista.

* * *

Ang pangugat sa presidente batok ni Sereno nakapahinumdom nato sa nag-alintabo niyang kasilag ni Senador Leila de Lima nga inadlaw niyang gibandilyo ug giundangan lang dihang nabalhug na si De Lima sa prisohan.

Sa makausa pa, napamatud-an nga dili gyud diay siya mosugot nga sukwahion, labi na kon babaye ang mangahas.

Ang lusot sa Malakanyang nga ang pag-apura sa presidente sa impeachment ni Sereno, maisip ra nga iyang awhag, isip maoy pangulo sa partido sa iyang mga alyado sa Kongreso apan maoy nipabantang kon unsa diay kaubos ang iyang pagtan-aw sa mga kongresista.

* * *

Ang kamatuoran mao nga bisan sa makabungog nga mayoriya sa mga alyado ni Presidente Duterte sa House of Representatives ug sa Senado, ug sa talagsaon niyang popularidad, wa sila makaseguro kon makonbikto ba si Sereno kon mapahigayon ang impeachment trial.

Mao nga inay tapuson na ang husay sa impeachment complaints batok ni Sereno sa niaging tuig, giinat nila hangtud sa niaging buwan ug giyak-an pa gyud pabor sa mas laktud, apan kuwestiyonableng petisyon sa quo warranto ni Solicitor General Jose Calida batok ni Sereno atubangan sa Korte Suprema.

* * *

Mas ganahan sila sa kahigayonan nga makumbinser ang mga mahistrado sa Korte Suprema, nga ang mayoriya ilang gituohang nangasuko sa kasina kay nalaktawan sa mas batan-ong si Sereno, pagdason sa eksperimento sa Malakanyang bisan klaro nga nisukwahi sa gitakda sa Konstitusyon nga mapalagpot lang ang chief justice pinaagi sa impeachment.

Sa pikas nga bahin, kon subayon ang naandang rota pagsang-at sa Articles of Impeachment batok ni Sereno, nga mosangpot sa impeachment trial sa Senado, wa kaseguro si Presidente Duterte nga makumbinser ang 16 ka senador pagkonbikto ni Sereno sa mga pasangil nga kasagaran nagsentro sa mga panagsungi nga administratiba.

* * *

([email protected])