EDITORYAL - Diborsyo sa Pilipinas

May kabalaka karon ang Simbahang Katoliko dinhi sa Pilipinas tungod niining pagpasar sa komitiba sa Ubos Balaybalaoranan niining Divorce Bill.  Gawas nga pasado na sa Kongreso, nigawas usab sa survey nga gihimo mismo sa Simbahan nga daghan ang pabor nga ipatuman ang diborsyo dinhi sa nasud. Dako kining hagit, kay bugtong ang Pilipinas na lang ug ang Vatican ang wala’y diborsyo. Sa ato pa, sa Pilipinas na lang nagpabilin ang inpluwensya sa simbahan bahin niini.

Natural gyud nga dili kini mapasar didto sa Vatican kay tua man magbase ang Santo Papa sa Romano Katoliko. Apan unsa pa man diay kadako ang gibug-aton niini kon ang Pilipinas na lang maoy nagpabiling wa’y Divorce Law? Kon anaa niining balaora, masayon-sayon na lang unya ang pagtalikod sa magtiayon sa ilang mga panaad sa kasal nga mag-inunongay sila sa kalisod ug kaharuhay, sa kasakit ug kalipay samtang buhi pa ang usa’g-usa.

Kining diborsyo maoy balaod para sa kalipay sa usa ka indibidwal nga wala makatagamtam niini diha sa ilang kaminyoon. Ngil-ad lang kay mabungkag man gyud ang pamilya ug magkabuwag-buwag ang mga anak. Apan paantuson pud diay sila kon magsige og bugno ang ilang mga ginikanan, o kaha ang usa sa ilang mga ginikanan iresponsable? Bisan asa niining duha, makaapektar gyud sa mga bata, apan maayong tan-awon kon asa ang mas adunay kahigayonan nga kining mga bataa masalbar.

Dili magbuwag ang magtiayon kon responsable ang babaye ug ang lalaki sa ilang mga panaad sa balaan nilang kaminyoon. Bisan naa o wala kining balaora, anaa ra gyud sa magtiayon kon sila mag-inunongay. Karon gani, bisan wala ning balaora, daghang kasado ang nagbuwag ug nangita og kalipay sa lain. Kon mapasar gyud sa hingpit kining balaora, wala na’y bili ang panultihon kaniadto nga ‘ang kaminyoon dili sama sa kan-on nga kon makapaso, mahimo ra nga iluwa.’