EDITORYAL - Diskontento sa mga tinun-an

Makaguol nga makalagot kining nahitabo sa Mabinay, Negros Oriental nga diin adunay usa sa mga produkto sa pangpublikong unibersidad ang nadakpan nga nakig-abin sa mga rebeldeng komunista.

Makaguol kay daghan diay gihapong mga estudyante, bisan og gikan pa sa sikat silang mga eskuylahan nagagikan mahaylo pa gihapon og mga propaganda.

Madani gihapon sila sa mga tam-is kaayong mga balak ug pagpanghaylo sa mga politikanhong mga grupo, ug ning tungora sa armadong walhong grupo sa New Peoples’ Army sumala pa sa kapolisan.

Kaning maong de primerong unibersidad sa gobiyerno maoy nagprodyus og mga maayong lider, opisyales sa militar ug kapolisan ug ingon man mga malampusong tawo sa natad sa negosyo ug uban pa.

Apan subo paminawon nga diha usab nagagikan ang pipila ka mga nahimong lider sa mga kalihokan sa rebelyon ug separetista sa nasud nga ang tumong mao ang paggun-ob sa gobiyerno nga wala nila mauyoni.

Makalagot kay daghan pa untang mga kabus nga mga kabataang Pilipino ang nagkinahanglan og de kalidad nga edukasyon ug may klarong tumong sa ilang kinabuhi nga mao ang pagtabang sa ilang pamilya ug sa nasud.

Limitado ang pundo ug alokasyon gikan sa gobiyerno alang sa mga iskolar ug maayo na lang unta og napunta kini sa klarong nagkinahanglan.

Daghang mga kabus ang wala gyud makatunob og kolehiyo apan adunay uban nga nakasulod na unta  ug gigastohan sa gobiyerno mao man hinuoy miunay niini pinaagi sa pagpas-an og armas ug pagsalmot sa rebelyon.

Kaning nahitabo sa maong kanhi tinun-an tilimad-on kini nga wa matagbaw sa gobiyerno o ba kaha sa mga palisiya sa mga tunghaan ang pipila ka mga estudyante. Posibleng dili lang ang maong dinakpan ang gibati og ingon niini.

Kinahanglang i-address dayon kini sa mga kadagkoan sa mga government universities.