EDITORYAL - Nagmika sa trabaho

Gibutyag sa kadagkoan sa Office of the Building Officials (OBO) nga walay permit ang Abraham Lee Construction nga nagtugot kanila sa pagtukod og bunkhouse alang sa ilang mga trabahador diha sa usa ka luna sa Archbishop Reyes Avenue. Ang bunkhouse nga hinimo sa mga metal pipes, nahugno kagahapon sa kaadlawon samtang nangatulog ang kapin sa 150 ka trabahador sa Abraham Lee Construction.

Lima gyud dayon sa mga trabahador ang nangamatay kay nadat-ogan sila sa mga puthaw ug mga plywood. Daghan nga nakaangkon og mga samad, samtang ang uban gilubat-lubatan sa kakuyaw nga gipukaw sila og usa ka trahedya nga wala gyud nila paabota. Giangkon sa kadagkoan sa OBO nga wala gayud nila masusi ang maong bunkhouse sa wala pa kini mahugno.

Nganong ingon man gyud niini ang sagad nga mahitabo? Masayran na lang nga walay permit ang pagtukod sa mga building o estraktura kon malambigit na kini og aksidente. Ang mao nga bunkhouse dili permanente, kay gani, gigamitan ra man kini og mga metal pipes. Apan kinahanglan gihapon kini nga lukatan og temporary construction permit.

Maisip nga “eye-opener” ang maong hitabo ngadto kang Mayor Tomas Osmeña nga kinahanglang dugangan niya og mga kawani ang OBO aron nga may mga sakop kini nga katahasan paghimo og mga inspection sa lainlaing construction sites dinhi sa dakbayan. Ang kapakyas sa OBO sa pagtuman sa ilang katungdanan tungod kay kuwang ang mga sakop niini, mahimong may kaakohan usab ang mayor.

Kon gituman pa sa OBO ang pag-inspection sa mga construction sites, sigurado nga molukat gayud og permit ang mga hingtungdan kay aron dili sila mapahamtangan og multa. Kini moresulta nga mosaka ang koleksyon sa buhis sa dakbayan nga magamit sa pagpatuman og mga proyekto. Unta, mag-inabtik na ang mga kawani sa OBO, ug ang nagdumala niining maong opisina mokumbinser gayud sa mayor nga dugangan ang iyang mga kawani.