Wa na’y inpluwensiya

Makaluluoy ang mga ginikanan sa usa ka babayeng bag-ong graduate sa kursong MassCom sa UP Cebu nga nadakpan didto sa Mabini, Negros Oriental niadtong miaging kaadlawon.

Imbes makatabang na unta sa pamilya si Myles Albasin, 21-anyos, kay nakagradwar na sa kursong MassCom, mag-antos na hinuon siya sa bilanggoan tungod sa iyang pagkahimong “amasona” nga New People’s Army (NPA) ug nadakpan atol sa operasyon sa kasundalohan sa Negros Oriental.

Ang nahitabo ni Albasin usa ka leksiyon sa mga ginikanan nga mitugot nga mahimong walhon ilang mga anak. Samtang walay tulobagon sa balaod ang pagka-aktibista ug pag-apil-apil sa mga rally sa atong mga anak, apan kon moalsa na gani og armas ug nahimo na nga NPA ug nakigbatok na sa gobiyerno, nahimo na siyang kaaway sa estado nga kon adunay operasyon sa kasundalohan mahimo na siyang mapatay.

Awhag nako sa mga ginikanan, nga kanunay ninyong hikutahon ang ilang mga binuhatan ug mga kalihokan. Ayaw pagtugot nga samtang inyo silang gigastohan sa pagpatungha, moapil sila nianang aktibismo. Tinuod nga walay perpekto nga gobiyerno ug nagkadaghan matag adlaw ang suliran sa nasud, ilabi na sa panggobiyerno.

Apan ang pag-apil sa NPA nakadugang sa suliran, inay makatabang pagpangita og sulbad. Mosamot kamakaluluoy ang atong mga anak kon madesisyonan na sa korte ang pagdeklarar sa mga rebeldeng NPA nga mga terorista tungod kay bisan asa mahimo na silang tumbahon tungod kay isipon na unya silang salot sa katilingban.

Busa anaa ra kanatong mga ginikanan ang desisyon.     Adunay mga ginikanan nga walhon og pagtuo nga motugot sa kalihukang walhon sa ilang mga anak. Wala gyud na’y problema kay nagtuo man kita sa demokrasya. Apan kon motugot na sila nga moalsa na og armas ang ilang mga anak, kanang klaseha sa mga ginikanan ang maayong panitan tungod kay nagtukmod na sila sa ilang anak ngadto sa bung-aw sa kamatayan.

* * *

Nagkinahanglan si Mayor Tomas Osmeña og igong pundo alang sa mga proyektong inprastraktura nga magsulbad sa suliran sa trapiko sa siyudad sa Sugbo. Gitambagan siya ni Konsehal Raymond Garcia sa pagduol sa Office of the Presidential Assistant for the Visayas nga gidumala ni Mike Dino. Tan-awon nato kon kaya ba nga tunlon ni Tomas ang iyang garbo. Kon naghunahuna siya sa interes sa kinabag-ang mga Sugbanong, tunlon ni Tomas ang iyang garbo ug moduol siya kang Dino.

Sayop si Tomas kon si DPWH-7 Ador Canlas ang iyang giduol aron maapil kuno sa budget sa ahensiya ang P2 bilyones niyang gipangayo alang sa mga proyekto. Si Canlas walay gahum paglista og pundo kay regional director ra. Si Dino suod ni DPWH-7 Secretary Mark Villar ug barkada ni Speaker Bebot Alvarez.     Dawaton na lang unta ni Tomas nga wala na siya’y inpluwensiya ug nagkalapad ang inpluwensiya ni Dino didto sa kaulohan.