Sheriff sa korte giliab ni Tomas

Mi-viral sa social media ang pagpangliab ni Mayor Tomas Osmeña sa usa ka sheriff nga mi-serve unta og court order alang sa demolition sa kabalayan didto sa Barangay Capitol Site.

Kuha kaayo sa video nga gi-post sa Facebook account sa usa ka Eric Amaro ang pagpang-harass ni Tomas sa sheriff sa korte nga igo lang nagtuman sa iyang trabaho.

Nakadawat hinuon og pagsaway si Tomas diha sa mga comments kay matud pa dugay naman nga nasayod ang mayor nga demolisonon na ang lugar. Gawas pa, igo ra gyud intawon nga nagtuman sa iyang trabaho ang sheriff.

Nagdala unta ang sheriff og papeles nga gustong ipakita ngadto sa mayor, apan giwakli kini sa mayor ug gibaharan og mga pulong nga pagpanghadlok.

Human niya giliab ang sheriff, gikasab-an pag-ayo ni Tomas ang sheriff nga ingon sa iyang sulogoon. Kita kaayo sa video ang gibuhat sa mayor.

Sumala pa sa mga netizens, gisunodsunod ni Tomas si Mayor Sarah Duterte kinsa mipakaon og papel sa usa ka sheriff nga mopatuman na unta og demolisyon didto sa Davao.

Kini man gud kang Tomas pakitang tao ra gyud kini nga kunohay molaban siya sa mga kabus. Pero ang tinuod sunod-sunod ra gyud ning iyaha sa mga Duterte.

Kon mangangkon siyang pro-poor, wala pa man makalimot ang mga tawo sa pagpangyatak niya sa mga barbecue sa Lahug ug niadtong pagtakin niya og pistola samtang nakig-atubang sa mga trabahante sa usa ka department store kay iyang gipugngan aron dili magwelga.

Sa iyang pagpasira sa Rico’s Lechon nga gamay’ng negosyante apan nakapatrabaho og mga pobreng trabahante, pila ka pobre ang iyang gikuhaan og trabaho?

Ang gibuhat nga pagpang-harass ni Tomas sa sheriff angayang dili palabyon sa Regional Trial Court Executive Judge sa rehiyon. Usa ka pagbugalbugal sa hustisya ang iyang gihimo nga mahimo siyang kapasakaan og “indirect contempt.”

Luoy kaayo ang sheriff nga igo ra gyud intawon nga nagtuman sa iyang trabaho nga pag-serve sa writ of demolition. Kon adunay kuwestiyon si Tomas, ipaagi niya kini sa korte ug dili ang pag-harass sa usa ka yano nga trabahante. Iya pa’ng gipangutana ang sheriff: “mosukol ka?”

Pastilan, Mayor Tom, wala pa gyud ka makasugat og mosukol nimo.      Dugay na bitaw ka nga mayor sa siyudad, apan makausa nawad-an na ka og gahum sa dihang napilde ka ni kanhi mayor Mike Rama.

Human sa imong kapildehan, puwerteng luoya nimo kay bisan na lang gani ang imong panawgon aron makig-inom o makigpangakape ka, kay diyutay na lang ang motagad nimo tungod sa imong batasan.

Karon imo pa gyud nga gipakita nga usa ka pobre ug yano nga sulogoon sa gobiyerno, ang sheriff nga igo lang nagtuman sa trabaho, imo pa gyud nga gi-harass.