Usa ka politiko ang tinuod nga nagpaluyo sa pagpamanhig patay kang Kapitan Imok Rupinta. Apan ang kapolisan nagtigum pa sa mga ebidensiya aron matumbok ang kalambigitan sa maong politiko. Apan kon kinsa man kining maong politiko, maayong hinganlan na kini ni Regional Police Office-7 Director Jose Mario Espino.
Sumala pa sa atong tinubdan, sa kadaghan nga gigamit sa mastermind aron maoy mopatay kang Imok, usa kini ka sapian ug inpluwensyado nga politiko. Kon kinsa man kini, maayong dili mahadlok ang kapolisan sa paghingalan niini bisan kinsa pa ang nagpaluyo niining maong politiko.
Desidido ang kapolisan sa pagpalawom sa imbestigasyon aron mismo ang mastermind sa kaso maapil ug mataral sa hukmanan. Kanang mga hitman nga nadakpan ug nangapriso na, maoy yawe sa dugang pa nga inpormasyon aron matudlo ang mastermind.
Apan adunay nagsulti kanako nga pabantayan ang mga lihok sa abogado nga gikuha sa asawa ni Imok.
* * *
Mibahad si Mayor Tomas Osmeña nga ipaubos sa evaluation ang mga garbage loaders sa kabarangayan ug kuyaw nga maputlan sila sa P4 mil nga binulan nga allowance kon mapamatud-an ang alegasyon nga mamili lang og kolektahonon kay gipanguwarta pinaagi sa pagkolekta sa basura gikan sa mga dagkong establisamento.
Ang pagpaubos sa evaluation tipik sa gahum sa mayor pagseguro nga walay binuang sa mga transaksyon sa mga barangay, ilabi na sa paghakot sa mga basura.
Apan unsa kining nadunggan nako nga giunhan lang og sumbalik ni Tomas ang mga garbage loaders sa kabarangayan agi’g pangandam sa mas dakudako nga transaksyon nga sudlan sa iyang administrasyon tali sa kompaniya nga gipanag-iya sa higala sa mayor, si Kapitan Franklyn Ong sa Barangay Kasambagan.
Ang Pasajero Motors Corp. ni Kapitan Ong maoy nakakuha sa kontrata paghakot sa mga basura sa siyudad sa kantidad nga P700 kada oras. Ang Pamocor ang tag-iya sa mga trak, maoy mosuweldo sa drayber, apan ang krudo o gasoline iya sa siyudad sa Sugbo. Kuwestiyonableng transaksyon kini. Pilde ang siyudad. Walay igong katakus ang kagamhanan sa siyudad sa pag-monitor sa oras nga magamit pagbiyahe sa basura. Pananglit magtuyoktuyok o maglangaylangay ang drayber, bayad gihapon ang kagamhanan sa siyudad.
Karon nga giinitan na usab ni Tomas ang garbage loaders sa kabarangayan, posible nga may plano kining bawion ang serbisyo paghakot sa basura sa pasangil nga lisud i-verify. Apan kay si Tomas man ang nag-estorya, mura’g ebanghelyo nga motuo na lang gyud ang mga tawo bisan atik lang kini aron ihanig sa mas halapad nga negosyo nga nahunahunaan.
Dili kita makasulti nga nagkunsabo si Ong ug si Tomas sa transaksyon sa basura. Wala kita’y ebidensiya. Apan walay aso nga makumkom.