Gipadayag ni Presidente Rodrigo Duterte atubangan sa mga sakop sa LGBT community sa Davao City ang iyang pagsuporta sa Same Sex Marriage.
Pero, puyde ba ang same sex marriage dinhi sa Pilipinas? Kon ang definition sa marriage sa Family Code sa Pilipinas ang basehan, dili puyde ug wala itugot ang same sex marriage.
Sigun sa Family Code, ang kaminyuon usa ka espesyal nga kontrata o kasabutan sa usa ka permanente nga panag-uban tali sa lalaki ug babaye aron matukod ang conjugal nga kinabuhi.
Kon kining maong kahulogan sa kaminyuon ang atong basehan, sa pagkakaron dili pa puyde ug wala itugot ang same sex marriage. Ang kaminyoon gitugot lang sa babaye ug lalaki ug wala kini itugot sa pareho nga babaye ug lalaki nga magminyo.
Hinuon, dako ang posibilidad nga matugot sa Pilipinas ang same sex marriage kon gustohon gayud ni Presidente Duterte, ug kini pinaagi sa iyang mga kaalyado sa kongreso.
Sa gidaghanon sa mga magbabalaod nga kaalyado ni Duterte, sayon ra kaayo niya ang pagpausab sa kahulogan sa kaminyuon nga maglakip ug magtugot na sa same sex marriage.
Sa pagpalabang unya puhon sa balaod sa same sex marriage, daghan nga mga butang ang angayan nga ikonsiderar ug usa na niini ang katungod sa tawo nga malipay ug ang relihiyusong baruganan.
Kon kalipay sa lalaki ug babaye nga magminyo, nganong dili man pud ihatag kining maong kalipay ngadto sa parehang babaye ug lalaki? Pero kon ihatag man kini, unsa may mahitabo sa atong relihiyusong pagtuo nga kalapasan kini sa pagtulon-an sa Ginoo? Kamo na la’y tubag.