Unsay gikahadlokan ni Kongresista Raul del Mar nganong misupak man siya sa Martial Law sa Mindanao? Kon makahigayon kong magkakita ni del Mar, mao kini akong ipangutana niya.
Ang mga taga-Mindanao, bisan niadtong mga lugar nga malinawon, suporta sa tinguha ni Presidente Rodrigo Duterte nga ipa-ubos sa Martial Law ang tibuok Mindanao. Nagsugod kini sa dihang giatake sa mga teroristang Maute ang Marawi nga mikalas sa daghang kinabuhi sa mga sibilyan ug kasundalohan.
Niadtong miaging pipila ka semana, gihangyo ni Duterte ang Kongresista nga i-uswag og usa ka tuig ang Martial Law sa Mindanao aron mapatuman ang kahapsay ug kalinaw ug aron mababagan ang mga posibleng pagpangatake sa mga teroristang na-impluwensiyahan sa mga ISIS.
Ang Philippine National Police maoy unang mirekomendar nga lugwayan ang Martial Law sa tibuok Mindanao, ug gidasonan kini sa Armadong Kusog sa Pilipinas. Mga 27 ka kongresista ug upat ka senador lamang ang misupak sa paglugway sa Martial Law.
Apan sa Sugbo, si del Mar lamang ang mibotar nga dili uyonan ang paglugway og usa ka tuig sa Martial Law. Ambot og nakapuyo ba kaha kini si del Mar sa Mindanao. O ba kaha nakapangutana kini sa sitwasyon sa Mindanao. Kay kon ang mga taga-Mindanao ang pasultihon, dako man silang uyon sa Martial Law.
Mao kini ang nakadaot sa mga politiko nato dinhi sa Pilipinas, molaban sa partido bisan ang gibarugan taliwas na sa tukma nga prinsipyo. Gibarugan gyud ni del Mar ang Liberal Party. Apan kon naghunahuna pa unta si del Mar sa kakuyaw sa mga terorista nga makapangatake og balik sa Mindanao, bisan mobarog lang unta siya alang sa kahusay ug kalinaw.
Mga kauban ni del Mar sa Liberal Party nga silang Senador Bam Aquino, Risa Hontiveros, Kiko Pangilinan ug Franklyn Drilon klaro naman daan nga anti-Duterte mao nga dili kita makapaabot nga mosuporta sila sa paglugway sa Martial Law.
* * *
Makita gyud gahapon atol sa Senate hearing sa kalabot sa kontrobersiyal nga anti-dengue vaccine nga Dengvaxia, ang pagkapulpol ni kanhi presidente Noynoy Aquino. Kun pangutan-on kabahin sa iyang meeting sa Sanofi Pasteur pagpalingoglingog ug magsige og lingi ug dili maminaw kang Senador Richard Gordon nga nangutana kaniya.
Siya ang unang gipasulti og opening statement sa wala pa ang question and answer. Ang ako lang niining maong kongtrobersiya, mapanubag ang mga opisyal nga angay manubag.
Dili lalim ang kaguol sa mga ginikanan sa kapin 7,000 ka mga bata nga naturukan niining Dengvaxia. Kun adunay class suit, i-apil ang tanan, bisan kanhi presidente pa.