Maayo nga lakang ang gihimo sa abogado ni Supreme Court Chief Justice Maria Lourdes Sereno nga ipreparar na lang sa House Committee on Justice ang article of impeachment aron ipasaka na ngadto sa impeachment court nga mao ang Senado.
Gusto ni Sereno nga patungahon sa House Committee on Justice hearing ang iyang mga abogado aron mohimo og cross examination ngadto sa complainant nga si Atty. Lorenzo Gadon. Apan dili gusto si Sereno nga i-cross examine.
Sa ato pa, gusto ni Sereno nga adunay due process alang kaniya lang.
Giluagan na sa Ubos Balay Balaoranan ang ilang patakaran. Gibuksan ang House Committee on Justice hearing kang Sereno aron makapresentar siya og mga ebidensiya batok sa mga pasangil ni Gadon.
Gusto niya nga “full blown” ang imbestigasyon pinaagi sa pagpa-cross examine kang Gadon pinaagi sa 11 niya ka abogado, apan dili siya ganahan motunga. Kining hearing sa komitiba sa hustisya nahisama kini siya sa preliminary investigation sa mga kasong kriminal sa mga krimen nga nagtangag og silot nga upat ka tuig, duha ka bulan ug usa ka adlaw nga pagkapriso.
Sa preliminary investigation pagdeterminar sa probable cause kon aduna ba gyuy krimen nga nahitabo, dili kinahanglan ang cross examination nga gihimo lang sa trial proper na gyud sa kaso. Gani, modawat lang og mga hearsay evidence ang preliminary investigation.
Apan naglibog ko nganong gusto gyud ni Sereno nga sama og trial sa korte ang hearing sa komitiba nga gipanguluhan ni Kongresista Rey Umali sa Marinduque. Nagtuo ko nga ang tuyo sa kampo ni Sereno mao ang trial by publicity. Gamiton nila ang ilang ipang-estorya sa komitiba sa publisidad alang kang Sereno.
Apan maayong hunongon na sa kampo ni Sereno kining taktikaha. Ang mga tawo wala pa malimot nga siya (Sereno) mismo ang nahimong direktang nakabenepisyo sa railroading sa imbestigasyon sa impeachment ni anhing Chief Justice Renato Corona. Kay kon wala pa ma-impeach si Corona, dili mahimong chief justice si Sereno.
Ang mga kamot ni Sereno adunay hugaw sa mga dugo ni Corona. Makita ang anino ni Sereno sa pagpa-impeach kanhi sa kampo ni kanhi president Noynoy Aquino kang Corona.
Kining impeachment proceedings ubos sa atong 1987 nga Konstitusyon usa ka political exercise. Busa kuli nga mahimug-atan ang mga ebidensiya batok sa impeachment officials una pa kini mapalagpot sa katungdanan pinaagi niining maong political exercise. Ug nasayod si Sereno niana.
Apan una pa, unsa ka tinuod nga adunay mga mahistrado sa Korte Suprema nga wala usab makauyon sa dinad-an ni Sereno? Hinuon, mahibaw-an nato kini unya inig sibog na sa impeachment trial sa Senado. Paabuton ta!