Bag-o pa kong pari niadto ug may gitambongan kong meeting sa distrito sa habagatang Sugbo. Ang gihisgutan kun wa ko masayop mao ang isyu kalabot sa pagpalambo sa programa alang sa mga katekista. Ang mga seniors nag- debate labi na kun unsaon pagpangita sa gikinahanglang funding. Apan wa mahisguti ang husto ug tukmang method sa kalambuan kay nakapunting na man nuon sa gastuhan. Sa dihang buot kong mopadayag sa akong panahom saba kaayo sila ug maayo na lang kay di ko tantong bogo mao nga nihilom na lang. Bisan asa tingali anaa gyud nang unhealthy pride, labi na kun himoon na nato ang atong kaugalingon ingon nga taksanan alang sa uban. Mao tingali nga daw usa ka dakong urom ang kukabildo labi na kun way mopaubos. Nahimong dakong haguka ang mga plano kun way lig-ong tumbanan sa panag-uyon sa baruganan ug binuhatan. Kay usahay dunay mga binuhatan nga nahimong sukwahi sa baruganan kay ang paghimo sa ingon nagpasabot man og material nga mga panalangin. Husto gyud si Buddha nga ang Right Understanding mahinungdanon kaayo labi na sa mga tawong buot moakop sa daghang mga laraw apan sa kaulahian kapoyon ka na lang. Di maayo nga magpaka hero taliwala sa mga tawong way igong pagtamod sa bisan unsay husto. Kun buot kang mamahimong labaw, nan, pagpaubos ug pagpakahilom samtang ang hunahuna mo naggambalay sa mga programa nga ginagmay apan makatabang sa mga tawong kanimo nagkinahanglan.