EDITORYAL - Pagtandi sa Marawi ug Yolanda

Natapos na ang katalagman didto sa Marawi City, katalagman nga dili mugna sa kinaiyahan, kondili, katalagmang mugna sa tawo nga nagbunga usab og kasakit, kawad-on ug kabantang sa mga apektado sa tino nga kaalaotan hinungdan nga kinahanglan dayon ang dinaliang rehabilitasyon.

Apan dili g’yud kalikayan nga may mga kiat og hunahuna nga mitandi sa klase sa dinaliang aksiyon sa gobiyernong Duterte sa gibuhat sa administrasyong Aquino kabahin sa mga biktima sa super typhoon Yolanda niadtong tuig 2013.

Ang duha ka katalagman dili managlayo sa epekto ug resulta. Apan ang kalainan lang kay aduna pa’y napudyot ang mga nabiktima ni Yolanda samtang kining sa Marawi daghang kabalayan ang dili na g’yud mapuslan ug daghan pa nga mga kabtangan ang nangahanaw. Gitandi g’yud dayon ang mga temporary shelters nga gihimo para sa biktima sa Yolanda ug sa Marawi, ug nakita ang kadako sa ilang kalainan. Bilyones pesos ang gikinahanglan aron mabalik ang orihinal nga dagway sa Marawi City.

Nakita nga mas nindot kaayo ang mga temporary shelters nga planong tukoron alang sa mga bakwit sa Marawi City nga ginama sa metal sheets, may kusina, kwarto ug kaugalingong pansayan. Samtang temporary shelter usab ang gitukod alang sa mga biktima sa Yolanda niadtong 2013, apan ginama lang sa coco lumber, wa’y kaugalingong pansayan ug mas gamay kon itandi sa gitinguha nga tukoron sa Marawi.

Samtang tuod makapahibulong ug makapaduda ang kadako sa kalainan sa duha ka matang sa temporary shelters, angay tingali una nga tan-awon kon unsa kalapad ang naapektohan nga mga lugar. Sa Yolanda, apektado ang Eastern, Central ug Western Visayas diin milyones ka tawo ang naapektohan, samtang sa Marawi City, wala gani kaabot og tunga sa milyon ang naapektohan sa maong siyudad, ug dili pa g’yud tanang panimalay ang nagusbat.

Ang gobiyerno mopaangay man sa pundo nga anaa sa iyang panudlanan, busa dili angay’ng itandi ang duha.