Klaro na mo kaayo

Daygon nako si Ermita Barangay Kapitan Imok Rupinta tungod sa aktibo na niya nga kampanya pagsumpo sa problema sa ilegal nga drugas diha sa iyang barangay.

Kaniadtong Huwebes, gipapitlan niya’g mga stickers nga “drug free area” ang kabalayan sa mga lumolupyo sa Ermita nga wala malambigit sa ilegal nga drugas.

Balit-ad ang gihimo ni Kapitan Rupinta kay sa gihimo ni Kapitan Junard Chan sa Barangay Pajo, dakbayan sa Lapu-Lapu. Ang susama nga lakang gihimo usab ni Kapitan Philip Zafra sa Barangay Tisa, dakbayan sa Sugbo.

Unta, ang gihimo nila ni Kapitan Zafra ug Rupinta, manakod sa ubang mga kapitan ug opisyal sa laing kabarangayan. Apan, kinahanglan nga samtang aktibo si Rupinta ug Zafra sa kampanya batok sa ilegal nga drugas, kinahanglang aktibo usab sila sa kampanya sa ilegal nga sugal.

Diha sa Ermita nakadungog ko nga wala gihapon mapuo ang mga video karera ug moli-moli diha sa Sitio Ermita Proper.

Sigun sa akong nadawat nga kasayuran, daghan gihapong gambling machines diha sa Ermita Proper nga “LT” ang tatak. Pangsakmita dayon kini ninyo Kap.

Diha sab sa dapit sa B. Aranas Street, dunay nag-operate diha og mga video karera ug moli-moli, LT sab gihapon ang logo, o marka.

Unya, kamong mga polis sa Waterfront Police Station, igmat g’yud mo kaayo nga dili makabalik ang mga gambling machines diha sa likud sa karaang provincial jail ug sa dapit nianang Liberty Lumber, apil na sa may Blessed Sacrament.

Ang akong nahibaw-an nga gipanguha pa kuno ang mga gambling machines nga ang marka “TM” ug “Dragon.” Sa Ermita, nakadawat ko og report nga hinay-hinay kunong namalik ang gambling machines nga kalabera ang logo.

May misulti usab hinoon nako nga ang ubang video karera gipalit sa tag-iya sa gambling machines nga migamit og logo nga buaya, unya anaa mag-operate sa dakbayan sa Talisay.

Kanindot diay no? Wala diay dakop sa mga illegal gambling machines diha sa Talisay City?

Pagtarong mo uy kay bag-o ra ba ang provincial director, tingali og mapulihan ang atong hepe diha sa Talisay.  Isip sakop sa Advisory Council sa Cebu Provincial Police Office (CPPO), makahimo ko sa pagrekomendar nga hulipan ang mga hepe nga magkiyugpos lang ug wala’y gihimo sa mga ilegal diha sa iyang dapit.

Unya, dinhi sa dakbayan sa Sugbo, akong pahinumdoman ang akong amigo nga si Senior Supt. Joel Doria nga wala g’yud molihok ang imong mga sakop Sir, kabahin sa mga illegal swertres sa ilang lugar.

Klaro kaayo nga nagdawatan ni sila og suborno gikan sa mga financiers. Diha sa Suba ug Pasil, wala g’yud nila himoi og kampanya ang mga operator diha.