Brgy Tapilon, Daan Bantayan, Cebu

“Kining among barangay daghan man unta’g  mga polis diri nga nagpuyo pero daghan man gihapon ang among mabantayan nga mga adik diri. Hinaot nga mahatagan kini’g aksyon sa mga polis diha sa siyudad o ba kaha sa PDEA.”

Brgy Curva, Medellin, Cebu

“Hangtod karon wala man gihapon trabahoa ang gubaon namong karsada diri dugay na kaayo kini namong gihangyo nga unta masemento na labi na kining short cut nga agianan padulong sa lungsod sa Daan Bantayan.”

Brgy Tejero, Cebu City

“Nganong wala man gyud kini madakpi ang mga pusher nga naa diha sa may likod sa Blessed Sacrament nga simbahan, unsa diay gisaligan nianang mga tawhana? Manghinaot kami nga maapil na intawon na sila’g dakop kay mga hambugero kaayo kanang mga tawhana.”

Brgy Banlasan, Calape, Bohol

“Sir Jun daghang salamat kaayo nga naa ka among masumbongan sa mga problema namo sa among barangay. Mohangyo lang ko nimo sir nga ipasusi kining among barangay kay naa man gihapoy mga adik diri nga wala madakpi.”

Brgy Guiwang, Alcoy, Cebu

“Dugay na kaayo kaming nangandoy nga mapaayo kining karsada namo diri nga gubaon pero hangtod karon wala man gihapon maayo. Kami manghinaot lang nga matagad na unta kining among problema kay lisod gyud kaayong kaagian ang karsada.”

Brgy Sawang-Calero, Cebu City

“Naay duha ka balay diri nga among nabantayan nga naay mga video karera machines ug moli-moli daghang mga bata ang among makit-an nga moapil. Usahay kining lugara mao sab ang estambayan sa mga adik diri sa among lugar.”

Brgy Lanipga, Consolacion, Cebu

“Dugay na gyud kaayo ming nag-antos niining gubaon nga karsada namo diri sa among barangay nga ipaayo pero wala may aksyon ang mga opisyal namo sa lungsod. Hasta ang mga barangay officials namo diri wala sad molihok.”

Brgy Kantubaon, Tabuelan, Cebu

“Asa na man intawon ang among mga opisyal sa barangay wala man gyud kami makabantay nga naa silay gihimo nga proyekto diri. Kaanugon sa gisweldo nila sa gobyerno nga wala nila trabahui sige lang dawat sa honorarium kining mga tawhana.”

Brgy Canduman, Mandaue City

“ Kanus-a man intawon mahuman og trabaho sa contractor kining karsada namo diri sa barangay nga dugay na man kaayo kini gisugdan pero hangtod karon sige man gihapon trabaho. Daghan na kaayong nag-antos sa katrapik diring lugara kay gamay naman lang ang agianan.”

Brgy Mabuli, Tabogon, Cebu

“ Kining among barangay murag nalimtan na man lang sa mga opisyal sa lungsod wala man kaayoy kaayuhan nga nahatod diri sa amoa. Hastang problema sa ilegal nga drugas wala na sad maatiman, napasagdan na gyud intawon kami diri.”

Brgy III (Poblacion), Tuburan, Cebu

“ Hoy mga polis sa among lungsod susiha sab intawon kining among barangay kay naay mga namaligya diri’g shabu nga wala gyud ninyo dakpa. Ayaw kamo pagtulog-tulog kay luoy kaayo ang mga bata nga maapil sa paggamit sa ilegal nga drugas.”

Alang sa inyong mga reklamo text lang sa 09083006702