Brgy Mambaling, Cebu City
“Naa mi silingan diri sa Sitio Ipil-ipil sa Alaska nga magsige’g daob unya kon badlungon masuko man hinoon. Ang mga opisyal sa barangay unta maoy mobadlong.”
Brgy Bulacao, Talisay City
“Kining Sitio Alegre wala na man gyud kini matagad sa mga opisyal sa barangay kay agianan gipamutangan man og tindahan nga maglisud na pag-agi ang mga tawo, labi na ang mag-wheelchair.”
Brgy Kinasang-An, Cebu City
“Kining mga internetan diri sa among lugar saba man kaayo panahon sa gabii, halos dili kami makatulog. Anha diha mahitabo ang baligyaay sa shabu.”
Brgy Campo, San Francisco ( Camotes Island), Cebu
“Susihon unta nila kining among barangay kay nakabantay ko nga ang materyales nga para unta sa proyekto sa gobiyerno, gigamit man sa personal sa usa namo ka opisyal.”
Brgy Talamban, Cebu City
“Nagkadaghan naman kaayo ang mga aser sa ilegal swertres diri sa among barangay ug wala man g’yuy gidakop. Nakabantay man gani ko og aser nga didto magpapatad sa presinto sa kapolisan kay naa man sa’y mga polis nga moapil pagpatad.”
Brgy Tayud, Consolacion, Cebu
“Wa g’yuy klaro nga koleksyon sa mga basura diri sa among lugar, mao nga nagtapok na lang diri sa bakante nga lote. Karon may gibutang na nga multahan sa maglabay og basura, asa na man namo ibutang ang among mga basura nga wala may nangolekta diri?”
Brgy Langtad, City Of Naga
“Nagsige na man lang ang pinatyanay diri sa among lugar nga dunay kalambigitan sa illegal drugs. Kanus-a man intawon masumpo ang pagkuyanap sa shabu diri sa among lugar uy nga wala man magpakabana ang among mga opisyal.”
Brgy Opao, Mandaue City
“Mohangyo ko sa taga TEAM nga unta madakpan kining mga tricycle nga nagbiyahi diri sa among lugar kay dili na man sila molahos sa Centro, luoy kaayo ang mga pasahero padulong sa merkado kay mag “two rides” na lang tawon.”
Brgy Pooc, Talisay City
“Unsa diay kining pamaligya og shabu diri sa among barangay, legal kini? Wala man gud ko kabantay nga naay nanakop diri nga mga polis bisan kon daghan kaayo’g makit-an diri nga namaligya og shabu.”
Brgy Lipata, Minglanilla, Cebu
“Ang atubangan sa simbahan diri sa among barangay kay gihimo na man intawon kini nga parkinganan o terminal sa kolurom nga mga van. Ngano nga wala man kabadlong ang taga LTO-7 ug kapolisan sa lungsod bahin niining daghang kolurom nga van.”
Alang sa inyong mga reklamo text lang sa 09083006702
- Latest
