Grabe kalawom na sa kurapsyon sa gobiyerno. Sa nagpadayong hearing kabahin sa smuggling sa Bureau of Customs, naapil na ang anak ni Presidente Duterte sa mga gipasanginlan nga nalambigit sa gitawag nga Davao Group. Ang bise mayor sa Davao City nga si Paulo Duterte gipasanginlan sa usa sa mga importer. Giingong adunay usa sa mga smuggler ang migamit sa pangalan sa presidente diha sa aduwana.
Natural nga ipanghimakak kini sa presidential son. Samtang ang presidente nanganti nga kon mapamatud-ang nalambigit sa kurapsyon ang bisan kinsa sa iyang mga anak, mokanaog dayon siya sa pwesto. Si Duterte naila na nga kontra g’yud kaayo ang kurapsyon. Sakit g’yud isipon kon ang usa, o bisan kinsa sa iyang mga anak ang mag-apil-apil niini.
Kaniadto pa, baniog na kaayo ang BOC sa kurapsyon, bisan gani ang kasamtangang komisyoner nga si Nicanor Faeldon miangkon niini nga grabe na kaguba ang pangalan sa ilang ahensiya tungod sa kurapsyon. Maayong mawadwad kining tanan, bisan anak pa sa presidente kon tinuod ang pasangil, kinahanglang manubag. Apan dili tingali makatarunganon kon tungod lang sa iyang anak, mokanaog si Duterte sa pwesto.
Kon sad-an ang iyang anak, dili kinahanglan nga paantuson ang milyones ka Pilipino aron lang salbaron ang dungog sa presidente kay daghan ang nagsalig kaniya karon isip lider sa nasud. Hinuon sa pagkakaron, wala pa’y ebidensya nga makatumbok kang Paulo sa maong alegasyon kay paghingalan ra man ang gibutyag. Apan bisan pa niini, kinahanglan g’yud nga ukayon kon unsa kini ka tinuod tungod kay mao may kontra sa presidente ang mga kurakot.
Maayo g’yud nga gukdon kining mga kurakot nga nakasapi gikan sa smuggling diha sa BOC. Kuwarta unta nga alang sa katawhan apan napunta lang sa pipila ka mga hakog ug maoy gigamit pagpakaon sa ilang pamilya.