Makapaduda

Makapaduda kining operasyon sa kapolisan diri sa among lungsod San Fernando, Cebu batok sa illegal gambling nga (swertres). Nagduda man gud ko ngano nga moapil ang hepe pag-endorso niining gitawag nga Small Town Lottery (STL).

Mura bitaw nga apil siya sa maong negosyo nga ang tanang nagpaduwa og lamesa or coordinator sa maong ilegal nga sugal, iya gayud gipangunayan og patawag uban sa mga tawo nga nag-endorso STL? Dayon, gihangyo ang tanang coordinator nga kinahanglan gyud kuno nga molabay sa ilaha o mo-remit aron walay dakop!

Sir, speaking of delicadeza as a public servant, mura man og dili maayong tan-awon nga ang usa ka opisyal sa kapolisan nakig-uban sa pribadong negosyante? Mura bitaw nga gigamit nimo ang imong posisyon aron matuman ang interes sa usa ka pribadong negosyante.

Ang kompaniya nga Saturn nga maoy nagpadagan sa STL, usa ka pribadong kompaniya ug kana maoy nakakuha sa accreditation or authorization aron magpadagan sa usa ka matang sa sugal. Unya moapil ka og kombinser sa mga tawo nga mo-remit mo didto sa STL? Siyempre mahadlok g’yud ang mga tawo, lalim ba’y hepe na gud na ang naa sa ilang atubangan?

For delicadeza Sir, kon naa kay kauwaw, dili unta ka mag-apil-apil nianang pag-endorso sa maong sugal kay pagkabakikawa g’yud tan-awon. Okay ra unta nga ma-involve ka kon sibilyan ka, or naka-retire na ka. Ang inyong trabaho ang pagpanakop sa tanang ilegal dili ang pag-endorso ug sugal.

Basin tinuod ning mga pagduda sa katawhan o hungihong nga naabot sa akong dalunggan nga ang imong pagpangusog, bugti sa mabubuting usapan? Ang tigbakay ug hantak Sir, dili diay na illegal gambling? o basin nahadlok ka nga tarugon na kay ang nagpadagan niana mga gamhanan ug kuyaw nga adto unya ka mabalhin sa Marawi? Isip tigpatuman sa balaod, unta patas ang pag-implementar o pagpatuman aron wala’y motumaw nga mga pagduda ug labaw sa tanan wala’y makatulisok nato isip sulogoon sa katawhan.

Unta kining akong yanong tampo makapahigmata sa among hepe ug sa uban nga tigpatuman sa balaod kay bugtong katuyoan nako nga isilsil sa ilang mga alimpatakan unsa’y husto nga gawi isip public Servant, ug limpyo nga pangalagad sa tanan.