Papel, ideya ug uban pa

Daghan kaayong mga pasumbingay ug pagpasabot kalabot sa Santisima Trinidad. Gani sa dihang estudyante pa ko si Padre Manny Ginete, CM ang nitudlo man namo kabahin sa Santisima Trinidad sulod gyud sa usa ka semester. Daghang mga interpretations, daghang mga papel ug mga basahon nga gitagik. Apan alang nako ang Santisima Trinidad mahimong sabton pinaagi sa pagpuyo mismo sa tawhanong relasyon.

Relasyon nga nahimong ulusahon diha sa kinabuhi ug relasyong mahigugmaon. Monotheistic ang Simbahang Katoliko sama sa ubang Christian Denominations gipahimug-atan niini nga dunay usa lamang ka Dios sa tulo ka managlahing persona. Sa kinabuhi nato karon nahimong daw sa conventional ug functional lamang ang relasyon.

Maayo pa og mapuslan ka pa kay ikaw pinangita ug kun sa kagamitan dili ka na mahimo sama ka sa disposable cup nga ilabay na lang sa suok. Nahimong daw usa lamang ka dakong surikbot ang pulong gugma kanila nga padayong nagpatansya nga dunay forever ning kalibutana. Nitingog ang akong cellphone dunay kausaban ang schedule kay mga tawo buot gyud nga dunay variation ang mass presider kada gabii. Hinuon ila pud nang desisyon. Tingali nakuwangan sa imong function.

Samtang namilo ko nikalit og tingog balik ang akong cellphone kay dunay nihangyo og laing schedule. Maestro nako sa Catmon nga namatay ug ako ang ilang pamisahon. Karon natataw ko na kun nganong ako tawgon o teksan nila.

Dili tungod kay buot silang makighugoy-hugoy ug makigkukabildo kondili tungod kay ako functional sa mga kalihukang sacramental. Hinuon, ana man ang kinabuhi utilitarian ug pragmatic kay kondili ko mokayod aw mamahimong panday di masweldohan ug proyekto di mahuman. Nitingog og balik ang akong cellphone sa gabii nga ang buwan hayag ra kaayo. nipahiyom ko nga nalipay kay text ni inday nagpahinumdom nako kun nakapanihapon na ba kuno ako….! Gugma ug pagtagad nga makahupay ning kinabuhing usahay budlay.