“Congratulations Hon! Captain-Mayor Gisela Bendong-Boniel!,” mao ni ang pahalipay ni Bohol Provincial Board Member Rey Niño Boniel sa iyang asawa nga gipasidunggan sa luwas nga pagpatugpa sa ayroplano nga usa na la’y makina nga nag-andar sa Mactan-Cebu International Airport (MCIA) gikan sa Ninoy Aquino International Airport (NAIA) sa Pebrero 28 sa niaging tuig.
Human lang sa duha ka buwan, napili si Gisela nga bag-ong mayor sa Bien Unido puli sa iyang bana nga nidaog sab pagka board member sa ikaduhang distrito sa Bohol, ug human sa usa ka tuig, gidakop sa kapolisan ang iyang bana samtang padayong gipangita ang iyang patay’ng lawas nga giingong gitambog sa kadagatan taliwa sa Sugbo ug Bohol.
* * *
Pasiunang kasayuran sa kapolisan naghulagway sa bana nga labihan ang kasuko nga iyang gilit-ag si Gisela pagbalik sa Bien Unido human nipetisyon pag-anular sa ilang kasal. Gisukmag si Gisela sa tiyan, gipugos pagpasakay sa bangka, gipusil patay, gipaputos og pukot, gibato-batoan ug gitambog sa dagat.
Dihang nadakpan sa mga polis, nipasangil nga nadakin-as si Gisela, sa wala pa mokumpisal atubangan ni PRO-7 Director Noli Taliño nga napatay si Gisela sa iyang sakop. Apan laing dinakpan niingon nga ang bana maoy nangunay pagpusil sa asawa.
* * *
Kalahi sa kabangis nga gipasangil sa bana, kon itandi sa iyang sinuwat nga pasidungog ni Gisela: “You have a superb airmanship, you are truly one of the finest talents in AirAsia! Whew! T’was a memorable flight with only one engine running! Though you are very privy on the details, but with this kind of commendation, I know it’s a matter of life and death situation.
“And as a female captain you didn’t crack under pressure and even you deliberately shut down engine 2 as precautionary measure. I can just imagine how many lives you’ve saved! No wonder why Filipino pilots are known as the best aviators in the world!”
* * *
Si Gisela nigradwar pagka piloto sa Cebu Aeronautical Technical School dul-an sa duha ka dekada ang nilabay. Sa gamay pa nga bata si Gisela, nagdamgo na siya nga makapalupad og mga ayroplano.
Dili kahibudngan nga dihang nakahukom kini pakigbuwag sa iyang bana ug pagbiya sa pagka mayor sa Bien Unido, gipili niya ang pagbalik sa pagka piloto. Unta.
* * *
(leo_lastimosa@abs-cbn.com)