Kun mga tudlo manakit

Dili kalikayan nga ang mga kamot nga wala maanad sa trabaho pangapoyon gyud kini nga lisud ilihok human sa gibuhat, ilabi na og mahanginan ang kamot ug ang mga kuyamoy, pamaolan nga grabe kasakit. Makaingon dayon kita nga mao na tingali kini ang artraytis.

Maingon gyud ang padulngan niini, kun dili ta magtagad dayon kun unsa’y buhaton nga dili kini mograbe. Angay nga magbaton kita og kahibalo nga ang mga kamot ug mga tudlo, maampingan kanunay nga himsog kini nato nga magamit. Sa ato pa, buhaton ang ehersisyo sa kamot nga maunat kini kada adlaw, sama niini:

* Fingers Stretch –pag-unat ni sa mga tudlo, pinaagi nga itisar pagbukhad ang kamot, nga balik-balikon, palihukon nga idikit-ibuwag ang mga tudlo.

* Fingers bend to fist – ituyhad ang mga kamot ug palad nga nakatisar ang posisyon sa mga tudlo. Dayon, balik-balikon nga kumoon – bukharon ang kamot  nga mura’g nagkitoy. Itisar kini nga nakaabli ang palad. Imo sab balik-balikon, nga hiposon sa palad ang mga tudlo nga porma’g kinumo. Mahimo nga dunganon o puli-pulihon ang tuo ug ang wala nga kamot.

* Fingers to palm & thump – ibukhad ang palad ug mga tudlo, nga tagsa-tagsaon nga sunoron ug puli-pulihon nga balik-balikon, nga nakakonektar sa kumagko. Samtang nakakonektar ang 1 ka tudlo, ang ubang tudlo pabilin nga nakatisar.

* Rubberband stretch – ang kumagko ug mga tudlo, sul-oban og goma o lastiko, unya itisar palihukon, ikaway kanunay nga idikit-ibuwag ang mga tudlo.

Praktisa kini nga paunat sa kamot sa tanang higayon, aron malikayan ang mga panakit sa tudlo. Haplasan og ‘olive oil’ kada sesyon. Maayo sab moinom pirme og ‘turmeric tea’ o linaga sa dulaw og luy-a. Igo na ang 1 ka tasa, 3 ka beses kada adlaw sa dili pa mokaon. Makatabang sab ni sa pagpahimsog sa lawas.