Paagi nga molugway ang kinabuhi (2)

* Dili palabi sa TV — Ang taas nga oras sa pagtan-aw sa mga programa sa television, seryoso kini nga makadaut sa panglawas. Ang pagmenus sa oras nga igahin sa pagsige’g tan-aw sa TV, makatabang na nga dili mabutang sa risgo ang kasingkasing.

* Manginlabot (reach out) — Sa pagdukiduki nagpakita nga ang kamingaw nga nag-inusara lang nga way pagpanginlabot sa kalihokan sa palibot, maka-mugna kini’g implamasyon o kadaut sa kaugalingon.

Sa panglawas, susama ra kini ka delikado sa nagbaton og taas nga kolesterol o hinigarilyo.

Ang kamingaw, labi na sa edaran nga naa lang pirme sa suok nag-inusara, nga wala’y pakabana sa katilingbanon nga kalihukan, sagad saw-on kini sa sakit nga depresyon.Busa mogawas gyud ug maglingaw sa kaugalingon.

* Diyutay lang sa ilimnon nga alkoholik — Igo na sa babaye ang 2-3 ka lag-ok niini ug igo na sab sa lalaki ang 3-4 ka lad-ok kada adlaw sa ilimnong alkohol, kay kun mapalabihan sa pag-inom niini, makadugang sa timbang ug sa problema sa relasyon. Makaayo sa kasingkasing ang ginagmay lang nga pag-inom, segun sa pagtuon sa Journal of the American College of Cardiology.

* Mokaun gyud og prutas ug utanon — Ang 3 ka serbi niini kada adlaw, tungod sa nutrisyon nga ‘fibers’ ug ‘vitamins’, 76% mopamenus sa risgo sa sakit sa kasingkasing, ug sa ‘breast cancer’.Makapabatan-on sab kini, molig-on ang proseso sa sirkulasyon gumikan sa nabatonan niini nga mga ‘antioxidants’.

* Undangon kun nanigarilyo — Segun sa American Journal of Public Health, kun niundang ang babaye sa edad 35, malugwayan ang kinabuhi.Ang pagsige’g sigarilyo, makadaut sa sistema sa baga ug makakanser sab.