Ang prutas nga lemon, paborito kini sa tibuok kalibutan ug esensyal nga pagkaon sa kusina. Usa sab kini sa prutas nga magamit gikan sa unod hangtod sa panit. Ang panit sa lemon nagbaton og daghan nga bitamina, minerales ug ‘fiber’ nga naghatag kini og usa ka elemento sa pagpalig-on sa nutrisyon.
Ang tinuod lang, ang panit sa lemon mas daghan o abunda nga mas dasok kini sa vitamin-C ug A, beta-carotene, folate, calcium, magnesium ug uban pa, kun itandi sa duga sa lemon (lemon juice). Ang bugnawon nga kahumot sa panit, presko ang alimyon niini nga hanggapon.
Makadugang sab kini sa kalami ug kahumot sa pagkaon ug ilimnon. Magamit sab ni nga panglimpyo.
(1) Ayuhon nga mohimsog ang panit —Daghan og benepisyo ang panit sa lemon aron pagpahimsog sa atong panit. Ang asido niini, motabang sa paglimpyo, pagpahamis, mopresko nga hayag ug lumoy hikapon ang atong panit. Dugang niini, motangtang sab sa patay nga selyula sa panit nga kailisan og mga bag-o nga selyula. Magamit usab kini sa sakit sa panit sama sa ‘acne’.
(a) Nusnosan o paghiran sa panit sa lemon ang tibuok nawong, ighuman hulata og 10 minutos, dayon hilam-osan og init-init pa nga tubig. Buhata ni 3-4 ka beses sa semana, aron mahamis ang nawong nga hayag o presko tan-awon.
(b) Ibuwad sa init ang wa na gamita nga panit sa lemon, o kaha paughon sa hangin og pipila ka adlaw. Ibutang sa blender, dayon paandaron nga mapulbos. Isagol ang 1 ka tasa nga pinulbos sa panit sa lemon, ug butanga’g tunga sa tasa nga asukar ug igo nga olive oil ug ‘honey’. Pastahon dayon ipaghid sa nawong.
(c) Mahimo sab galingon (grind) – pinuhon ang panit sa lemon, butangan og gamay tubig nga igo’ng mapasta. Paghiran ang apektado nga panit nga gi-acne. Pasagdi sulod sa 10 minutos, dayon hilam-osan og init-init pa, kausa sa usa ka ka adlaw.