Pagkaong pahimsog sa atay (2)

Samtang ang atong sistema sa imyun, nanalipod sa atong lawas gikan sa mga peligro, ang atay sab maoy nagprotehir sa imyun nga dili kini mabun-og (overloaded), aron pabilin nga kini molig-on.

Ang paglikay sa subra nga pagkunsomo sa pagtabako o panigarilyo, alcohol, kape, ug puti nga asukar (refined sugar), ug ang pagdugang og igo nga ehersisyo ug pag-inom og daghang tubig, usa kini sa makapahimsog sa atay. Duna sa’y mga pagkaon nga mopahimsog sa atay, sama sa mga mosunod;

* Ahos (garlic) —Mopagana kini sa mga enzymes, nga limpyohan o igawas ang mga toksin o hugaw sa lawas. Nagbaton ni’g allicin ug  selennium’, nga mopalimpyo sa atay, matud ni Suri, usa ka nutrisyonista.

* Buongon (grapefruit) — Ang pagkaon o pag-inom sa duga (raw juice) niini, makatabang sa pagpagawas sa carcinogens  ug sa toksins. Dasok sab kini sa vitamin-C ug  antioxidants.

* Remolatsa (beetroot) — Nagbaton ni og taas nga  flavanoid compound’, nga mopahimsog ug mopalig-on sa trabaho sa atay.

* Mga dahon sa utanon (leafy green) — Sama sa agbate (spinach) ug lettuce, nga pulos nagbaton og katakos sa pagwagtang (neutralize) sa metal ug sa kemikals ug hilo sa peste (pesticides). Nagsilbi kini nga mekanismo sa pagprotehir sa atay nga dili basta maunsa ug mainutil sa iyang trabaho.

* Green Tea (herbal nga tsa) — Puno kini sa antioxidants  nga  Catechins, nga naila nga mopalig-on o mopahimsog sa atay.

* Avocado — Ang pagkaon niini nga kanunay iapil sa atong pag-diet kay makatabang kini sa lawas aron ang atay makaprodyus og  gluthathione, nga magamit kini nga igawas sa atay ang mga makadaot nga materyales.