Ang nakadaot ni Mayor Tomas Osmeña hilig kaayo siyang magtuyoktuyok sa iyang estorya aron dili masakpan nga gilapas niya ang balaod.
Karong bag-o, giakusahan siya nga naghatag og ambulansya sa usa ka pribadong tawo sa Sambag 1 sa ngalan ni Aileen Guardo, ang misis ni Konsehal Jerry Guardo. Apan matud ni Tomas nga wala siya magdestino og ambulansya kang Aileen kay wala siya makahinumdom nga nakapirma og dokumento nga nagdestino sa maong ambulansya sa asawa ni Konsehal Guardo.
Bitaw no? Kun imong paminawon si Tomas, makaingon gyud ka nga nayabag na ang mga nag-akusar niya kay nagpataka lang og estorya. Wala man siya makapirma og dokumento nga nagdestino sa ambulansya ngadto sa pribadong tawo, kun dili sa mga opisyal sa barangay.
Si Nagiel Bañacia, ang PIO ug labaw sa City Disaster Risk Reduction Management Office, miangkon nga sa iyang ngalan nakaresibo ang maong ambulansya.
Apan hain man karon ang ambulansya? Unya si Tomas miingon nga si Aileen consultant sa Barangay Mayor’s Office kon BMO sa Sambag 1. Pastilan, kita pa man hinuong mga Sugboanon ang ilaron uy!
Naa may mga elected barangay officials ang Sambag 1, ngano nga adto man sa dili opisyal sa barangay? Kaila ko niining Aileen. Maayo man kini nga tawo ug aktibo sa barangay. Wala ko’y isyu kaniya ug sa iyang kabuotan. Apan nganong siya man ang maggunit sa yawe sa ambulansya?
Bisan unsaon og tuyoktuyok ni Tomas sa iyang estorya, nakahibalo na man kita nga kining iyang BMO mao kini ang iyang giatbang sa mga opisyal sa barangay nga dili iyaha sa miaging eleksyon.
Gani, kun adunay mga request ang barangay nga pirmado sa mga opisyal nga dili iya sa BOPK, sa basura mapunta ang request. Apan kun sa BMO, aprobado dayon.
Ang nakadaot lang kay ang Department of Interior and Local Government -7 mga “yellow” pa, kun salin sa administrasyon ni Noynoy Aquino ug Mar Roxas, mao nga inay aksyonan nila ang reklamo sa mga opisyal sa barangay nga wala irekognisar ni Tomas ilang awtoridad, milaban hinuon kini ug mitapion sa BMO ni Tomas pinaagi sa pag-ingon nga wala’y BMO.
Hinuon, may katungod ang mga opisyal sa siyudad ug sa mga barangay pagkiha sa mga sakop sa DILG-7 pagpabaya ug kapakyas pagbadlong ni Tomas ug nianang iyang mga BMO.
Ning mga panahona, nadaot na ang mga lokal nga kagamhanan tungod kay gikaon na sa politika.
Mao kini hinungdan nga kadaghanan sa mga siyudad ug munisipyo nga nagbalikbalik lang ang mga apilyedo sa mga politiko nga managpakadaog sa eleksyon, wala gyuy kalamboan nga tarong kay politika ang naghari.
Pun-an pa sa DILG-7 nga adunay mga opisyal nga kusog moduwa sa mga politiko.