Sa katilingban diin kita karon napalibotan, sa presyur sa kaakohan nga mapatunhay ang gitumong nato nga misyon sa kinabuhi, wala kita’y hunong sa pagpangabkab og kahigayonan nga makadiskarte unsaon nga magmalampuson. Tungod niini, angay kita nga makat-on sa pag-ila sa mga indikasyon sa mga tawo nga dili gayud makalaum nga magmalampuson sa kinabuhi. Sama niining mosunod;
* Hinawayon ug pala-away — Mopaislag kini sa mga higala o mga tawo nga dili gusto og kasamok. Manaway nga wa’y dugukan, hangtod nga mosangpot sa away. Gusto siya nga mao kanunay ang ilhon nga husto ug masentro sa pagdayeg.
* Madinumtanon — Tungod sa kahiubos ug kahimangod sa unsa man nga hinungdan, dili maantigo mopasensiya o mosabot ang kaugalingon. Igo lang iluom sa dughan nga naghambin og pagdumot.
* Basulon ang uban — Basta mosipyat sa iyang buhat, modayon og basul sa uban nga mao kuno ang nakaingon sa kapalpakan.
* Nakahibalo na kuno sa tanan — Mao nga sirado na ang hunahuna, dili maminaw sa moabot nga bag-ong oportunidad.
* Iyahon lang ang mga kredito — Gusto niya nga pirme angkunon ang kredito, aron ingnon nga maayo, apan diay hakog ang pagkatawo.
* Nag-apong pirme sa TV — Nga wala’y nahimong kalamboan, nagpalabay nga giusikan ang panahon. Nahunong ang kalihokan nga molambo ang kinabuhi.
* Libakero — Mahiligon nga dauton ang kinabuhi sa uban ug masuyaon.
* Masuk-anon — Putong og hunahuna, mainiton nga pirme labad og ulo.
* Wa’y direksyon sa kinabuhi — Pataka lang og rumbo nga wa’y tumong.
* Malipay nga mapakyas ang uban — Igihan nga gusto’ng siya ra’y mabulahan.