Intense ang preparation sa holy week ug gani nagtukaw kasagaran sa mga batan-on aron lang mamahimong hingpit ang kasaulogan pinaagi sa mga pagbansay-bansay ug uban pa. Inubanan sa gasto nga wa dinhi wa didto sa panghinaut nga mamahimong nindot ang tanan. Ug sa dihang padung na ang gabii sa Sabado Santo nisuol ang akong allergy inubanan sa pag-ubo-ubo. Nibunok ang uwan ug ang gipaabot nga dagsa sa mga tawo nahimong daw pudyot na lang sa manambongay. Usa ka teenager presumably grade 10 niingon: “Di ba gusto ni God nga siya simbahon? Apan nganong nitugot man siya nga mouwan pag-ayo aron ang mga taga bukid nga maglisud og plite ug molakaw padung dinhi ang mahikawan sa kahigayonan tungod ning uwan nga wa kinahanglana!” Wa koy nahatag nga tubag kay ang akong ubo maoy nipasulabi. Apan sa akong hunahuna nakapangutana ko ngano man tuod nga nahitabo man kini? Nagpasabot ba kini nga husto gyud ang mga gipamulong sa mga process theologians nga ang tanan proseso lang ug way kontrol ang Dios sa liyok sa kinaiyahan kay nahiuban lang siya niini? Hinuon nipadayon ang kasaulogan gihatag gihapon ang bisan unsa nga nindot ug mahimo taliwala sa makusog nga bunok sa uwan, dakong bayranan sa kuryente, diyotay nga manimba ug way hunong nga ubo ug hilanat.