Wala malilong kang Mayor Tomas Osmeña nga kun mobunok ang kusog nga ulan dinhi sa Dakbayan sa Sugbo, lunopan dayon ang kinapusoran nga bahin sa siyudad.
Panahon nga maglunop ang downtown area sa Dakbayan sa Sugbo, ang katawhan magbagulbol ug mobasol sa mga nagdumala sa siyudad nga wala magtagad sa maong dugay na kaayo nga problema.
Angay’ng pahimuslan unta ang panahon sa ting-init pinaagi sa paghabwa sa mga lapok nga nakabara sa mga drainage systems, ilabi na ang gihimo nga mga “dikes” diha sa bukid nga napuno na sa mga lapok.
Kun gihabwaan pa unta kanunay sa lapok ang mga “dikes,” makapugong kini sa tubig aron dili dayon diretso nga modagayday paingon sa mga lupa nga bahin sa siyudad, apan pakyas ang mga opisyal sa dakbayan paghimo sa ilang gimbuhaton.
Ang mayor daghan og mga opisyal nga makaabag unta kaniya aron makatuman siya sa maayong pagserbisyo sa katawhan, apan utro pa sila nga pakyas sa pagtuman sa ilang katungdanan.
Dili mabasol ang katawhan nga makahulagway ni Mayor Osmeña nga “busy” kaayo sa pagpanggukod sa mga tawo nga iyang gikasuk-an pinaagi sa pagpiit sa ilang mga negosyo, apan iyang nakalimtan ang paghatag og mga maayong serbisyo.
Husto ang mayor nga angay’ng mobayad gyud sa tukmang buhis ang mga magpapatigayon, apan kun ang iyang gukoron mao lang ang mga negosyo nga gipanag-iya sa mga negosyante nga iyang gikasuk-an sa wala mahibaw-i nga hinungdan, mahulagway siya nga dili makiangayon.
Apan may panahon pa ug dili pa ulahi ang tanan. Kinahanglan nga bukhon na unta ni Mayor Osmeña ang iyang mga mata, ingon man ang iyang mga sinaligan nga opisyal, aron makita nila kun unsa’y angayang himoon aron kaserbisyohan ang katawhan ug dili na unya magbagulbol kun moabot na ang kusog nga pagbunok sa ulan.