Semana Santa na

Sunod semana, Holy Week na. Alang sa mga practicing Catholics, balaan kini nga semana. Apan alang sa uban, ordinaryo lang kini nga semana.

Gani lingaw-lingaw kini alang kanila, padayon sa naandan nilang kalihukan pagtagbaw sa mga lawasnon nilang  panginahanglan ug kahinam.  Gani, alang sa uban, vacation grande kini nga okasyon.

Ang mga beaches ug mga tourist spots mas makalingaw kay sa mga simbahan. After all, matud nila, God is everywhere, busa dili kinahanglan mosulod sa simbahan.

Alang nila, wala kinahanglana nga mo-pause for a while, aron mamalandong sa pagpasakit ug pagpakamatay ni Hesus pagpapas sa ilang kasal-anan.

Alang nila, dili kinahanglan nga maghinuklog ug maghinulsol tungod kay wala sila’y sala, ug wala kinahanglana ang pagtubos kanila gikan sa kasal-anan.

Alang kanila, kun mo-acknowledge man sila sa ilang pagka-makasasala (which is unlikely), moderitso sila’g kompisal ngadto sa Ginoo ug mangayo’g pasaylo (lagmit, ila lang teksan ang Ginoo), ug dili ipaagi sa mga pari, kinsa matud nila mas makasasala kay   kanila.

Ang uban pud, mag-music festival gyud. Ilang pahimuslan ang pagdagsang sa mga tawo sa ilang dapit. Gi-negosyo ang Semana Santa. Ila sab ni. Wa na ta’y mahimo niini.

* * *

Giingon nga mas grabe ang problema sa trapiko sa Sugbo kay sa Manila. Kini tungod kay huot ang atong kadalanan ug nagkadaghan ang mga sakyanan.

Ang mga bright natong mga lider nakakita’g solusyon. Sa ato na nga nahisgutan dinhi, ang bright nilang solusyon mao ang pagpausbaw sa buhis sa mga sakyanan, aron diyutay na lang ang maka-afford pag-acquire og mga brand new nga sakyanan. Sa ingon, ma-decongested ang trapiko.

Bright idea?  Magkamahal ang sakyanan, magkataas ang excise tax. Sa ato pa, ilang i-discourage ang pag-manufacture og mga behikulo, kun mahimo, ilang tak-upan ang mga planta nga manggama og mga sakyanan sa kadalanan.

Unya, unsa’y mahitabo sa local automotive industry? Unsay mahitabo sa mga yano nga lungsoranon nga tipik sa ilang mga damgo mao ang pag-angkon og kotse? Bisag multicab na lang.

Pastilan, mao ra ba kini ang bugtong solusyon pagsulbad sa problema sa trapiko sa atong nasud? Mao ra man og nagpasayon lang sila.

Ug sa ato na nga gibalikbalik dinhi, usa sa nakatampo sa suliran sa trapiko mao ang kahuyang pagpatuman sa mga balaod sa trapiko, kon lax in the enforcement of traffic laws and regulations, ug ang kawala’y disiplina both sa mga motorista ug pedestrian.

Ayaw hikawi ang Pinoy pag-angkon og kaugalingong sakyanan.