Nakapabulilyaso ni Sueno
Human sa pagsibaw sa mga huhungihong tungod sa wa dayon mabutyag nga mga detalye sa pagtaktak ni Presidente Rodrigo Duterte ni kanhi DILG Secretary Mike Sueno, giluwatan sa presidente ang opisyal nga bersiyon sa insidente bisan wa niya nganli ang gitangtang nga sakop sa gabinete.
Wa diay katarong og tubag si Sueno sa iyang pagpakisayod sa mga pasangil sa kahiwian sa iyang departamento, mao nga nabatyagan ni Duterte nga gibugoan ang kalihim niya o bakakon gyud nga dako. Matud sa presidente, nawala ang iyang pagsalig ni Sueno maong iya dayong gitaktak sa katungdanan.
* * *
Ato ning klaruhon. Way lalis nga ang tanang sakop sa gabinete makapabilin lang sa puwesto kun may pagsalig pa ang presidente nila.
Husto si Sueno nga si Duterte ra ang magbuot kun magpabilin o mapalagpot ba siya sa gabinete. Apan giangkon sa Malakanyang nga wa pasanginli si Sueno og bisan unsang kahiwian.
Masabot sab gikan sa sulti ni Duterte nga wa’y imbestigasyon nga nalusad batok niya. Wa lang ganahi si Duterte sa tubag ni Sueno, nga iyang giisip nga nagpa-goryo-goryo sa nadawat sa Malakanyang nga mga pasangil sa kahiwian sa DILG.
* * *
Ang wa isulti ni Duterte, gisulti sa kaatbang ni Sueno nga si DILG Undersecretary Jesus Hinlo, kinsa nitumbok sa pagdason ni Sueno sa pagpamalit sa Rosenbauer firetrucks bisan wa’y subasta ug bisan may nag-ung-ong nga kaso sa Korte Suprema.
Gipanalipdan hinoon ni Sueno ang transaksiyon nga iyang nasunod gikan sa niaging pamunoan:
Mas barato ang brand nga firetrucks gikan sa Austria kay sa lokal nga firetrucks nga reconditioned; gawas pa, wa’y temporary restraining order nga giluwatan ang labaw’ng hukmanan.
* * *
Nataligam-an ni Sueno nga ang transaksiyon, kabilin ni kanhi DILG Secretary Mar Roxas ug naglisod tingali pagsabot si Duterte nganong gidasonan ni Sueno ang gikuwestiyon nga transaksiyon sa labing gikasilagan niyang kaatbang sa niaging piniliay.
Wa katabang ang pahibawo ni Bise Presidente Leni Robredo nga nisugot si Sueno pakigtagbo niya labot sa gubat sa drugas ug ang pagbutyag ni Arsobispo Socrates Villegas, presidente sa Catholic Bishops Conference of the Philippines (CBCP), nga nakigtagbo si Sueno nilang mga obispo aron pagpasalig nga bisan sa mga pamalikas ni Duterte andam ang gobiyerno nga makigtambayayong sa Simbahang Katoliko.
- Latest
