Gitaktak na sa katungdanan si Interior and Local Government Secretary Ismael Sueno isip sakop sa gabinete ni Presidente Rody Duterte. Sumala pa ni Presidential Spokesperson Ernesto Abella nga gitaktak si Sueno tungod sa “loss of trust and confidence.” Buot ipasabot niini, si Presidente Duterte wala na’y salig kang Sueno mao nga gitaktak kini sa katungdanan.
Ang nakapaet, gipahibalo ang pagkataktak ni Sueno atol sa katapusang hugna sa ika-14 nga Cabinet meeting niadtong Lunes. Didto pa gyud si Sueno diha nga gipahibalo ang pagtaktak kaniya. Niadtong miaging bulan, si Pete Laviña mi-resign sa katungdanan tungod sa isyu sa kurapsyon sa National Irrigation Administration (NIA). Apan sumala sa balita, wala moluwat si Laviña sa katungdanan kay gitaktak usab kini ni Duterte.
Laing giinitan sa administrasyon ni Duterte mao ang duha ka opisyal sa National Food Authority (NFA) nga sila si Jason Aquino ug Ludovico Jarina. Sumala sa balita sa Philippine Star nga nag-quote ni Cabinet Secretary Jun Evasco, nga gihimong gatasan (cash cow) ang NFA.
Nagpasabot lang kini nga wala’y giila si Duterte, nga bisan kinsa sa iyang administrasyon, bisan suod pa niya, iya gyud nga taktakon kun adunay bahid sa kurapsyon.
Apan nagduda ko nga kining pagkataktak ni Sueno dala na kini paingon sa pagsulod sa mga Marcos sa administrasyong Duterte. Nagtuo ko nga ang itudlo ni Duterte isip kalihim sa Department of Interior and Local Government (DILG) hulip kang Sueno mao si kanhi senador Bongbong Marcos. Ang mga Marcos dako og natabang sa kadaogan ni Duterte sa presidential elections niadtong miaging tuig, ug giangkon kini ni Duterte.
Apan maisip man nga utang kabubot-on ni Duterte ang pagbutang ni Bongbong sa DILG, apan wala’y angayan kagul-an ang katawhan kay maayo man kini og rekord sa dihang sakop pa siya sa Senado. Karon nga gipakita gyud ni Duterte nga tumanon gyud niya iyang bahad sa mga kurakot niyang mga sakop sa administrasyon, magbantay na gyud ang tanan aron dili mahisama kang Laviña ug kang Sueno.
* * *
Nakabantay ba kamo nga nag-usab-usab na ang pamahayag ni Mayor Tomas Osmeña kabahin sa ilegal nga V-hire terminal sa karaang Citi-Center sa Kamagayan? Kaniadto, isog kaayo si Tomas nga modepensa nga makatabang sa mga kabus ang V-hire sa Junquera ug dili gyud niya ipasira bisan pa nga nakalapas kini sa ordinansa nga siya ra ang nagpirma.
Apan human siya nakig-meeting kang retired Judge Menmen Paredes, nausab na ang timpla ni Tomas. Miingon na siya nga “experimental” ra ang maong terminal. Aw, abi nako og isog.