Daghang apektadong mga institusyon ug mga establisamento nga apektado sa giplanong Bus Rapid Transit (BRT) sa siyudad sa Sugbo.
Sumala sa balita kagahapon, ang mga apektadong mga institusyon ug establisamento anaa sa mga importante kaayong lugar sama sa Natalio Bacalso Avenue, Osmeña Boulevard, Escario Street, Archbishop Reyes Avenue, Governor Mariano Cuenco Avenue, Barangay Bulacao, Barangay Talamban, ug South Road Properties. Ang mga dagkong establisamento nga apektado sa BRT mao ang Cebu Normal University, Cebu Doctor’s Hospital, adunay hotel ug mga mall. Daan na kitang nasayod nga kining BRT project makaguba og komunidad. Apan gipadayon gayod kini tungod kay mao lamang kini mass transport system nga nakit-an ni Mayor Tomas Osmeña nga makasulbad sa trapiko sa siyudad sa Sugbo. Wala ikonsiderar niini ang LRT o MRT system. Sa inyong tan-aw, makasulbad kaha sa trapiko kining BRT o makasamot hinuon, gawas nga makadaot kini sa mga institusyon ug mga dagkong establisamento sa atong komunidad? Maayo tingaleng hunahunaon kini og kadaghan.
* * *
Nagmalampuson kagahapon ang #Duterte Malasakit Serbisyo Caravan sa Office of the Presidential Assistant for the Visayas sa nagkalainlaing lugar sa Kabisay-an. Dinhi sa Sugbo, gihimo ang medical, dental, optal, legal, federalism, anti-drug ug livelihood seminar, ug uban pa nga mga serbisyo didto sa Barangay Sambagon, Pinamungajan, Sugbo.
Niining maong kalihukan, nakighiusa ang OPAV sa AFP Central Command, 7th Regional Community Defense Group, 1901st Infantry Brigade Ready Reserve, Joint Cebu Ready Reserve Battalion, 5th Technical and Administrative Service, GV Hotel Group, Task Force Cebu, 47th Infantry Battalion, Division Reconnaissance Company sa 3rd Infantry Division, Naval Forces Central, 5th Air Reserve Center sa Philippine Air Force, People’s Initiative for Federalism, Universal Feedmill Corp., SHS Batch 85 Foundation, SimplyShare, Minglanilla Volunteers Foundation, Philippine Statistics Authority, Carcar Volunteers for Duterte, Department of Health, Department of Agriculture, Land Transportation Office, Philippine Nurses Association Cebu Chapter, Bisaya Na Pud Movement, Barangay Sambagon, ug Municipality of Pinamungajan.
Laing mga serbisyo sama sa feeding gihimo sa isla sa Pangan-an, dakbayan sa Lapu-Lapu ug sa Norkis Park sa Mandaue. Ang mga civilian volunteers nakighiusa sa 802nd Infantry Brigade sa Philippine Army sa pagpahigayon og dakong medical mission sa Isabel Leyte. Inabagan kini sa PASAR.
Adunay mga volunteers sa federalism movement sa Kabisay-an nagpahigayon usab og susamang kalihukan sa isla sa Bantayan ug sa Bohol.
Kining maong mga kalihukan sa nagkalainlaing lugar sa Kabisay-an gihimo isip halad sa mga volunteers ngadto sa mga tawo dungan sa pagsaulog ni Presidente Duterte sa iyang ika-72 nga kasumaran sa adlaw niyang natawhan. Sa lungsod sa Pinamungajan nga gitambongan gyud nilang Centcom Deputy Commander Brigadier General Allan Arojado, Col. Erik Espina sa 1901st, Col. Nestor Abando sa 7RCDG, ug Mayor Glenn Baricuatro sa Pinamungajan nakaserbisyo og dul-an sa 1,000 ka mga residente sa lugar.