Nganong nagpa polis-polis

Naghago si Mayor Tomas Osmeña og dala sa mga polis sa siyudad ngadto sa balay sa mga Lim sa iyang giingon nga “raid” apan wala kini maayong resulta. Ang nahitabo, ang Malacañang maoy nagbuot nga adto kang Police Regional Office-7 Director Noli Taliño gipa-surrender si David Lim Jr.

Ang paglabawlabaw ni Tomas sa mga polis nagpakita lang nga wala kini salig sa mga polis sa siyudad nga maaresto ang batan-ong Lim. Nangunay kini sa pagpangulo sa mga sakop sa Special Weapons and Tactics (SWAT) sa pag-“raid” sa balay sa mga Lim sa Maria Luisa Subdivision.

Pero sa gipakitang pag-polis-polis ni Tomas, misamot hinaot og tago ang batan-ong Lim. Sa bugalbugal pa nga estorya sa akong amigo, matud pa niya, “hadlok si David Lim Jr. mopatim-aw nga gidaladala ni Tomas si SPO1 Adonis Dumpit.

Tungod tingali sa kahadlok, mao kini hinungdan nga ang inahan ni David Jr. nga si Judelyn didto midangop sa Malacañang pinaagi kang Special Assistant to the President Bong Go.

Bitaw katingad-an kaayo ngano nga wala mosalig ang pamilyang Lim kang Tomas nga siya man unta ang mayor sa dakbayan sa Sugbo. Aw balik ta sa iyang pagpa-polis-polis, mahimo ra man unta mo-advice si Bong Go sa inahan ni David Jr. nga adto pasurenderon ni Osmeña ang iyang anak. Kay sa sayo pa, si Tomas ang nagsige og text ngadtong Bong Go.

Hinuon katingad-an sab kaayo kay mura’g walay gana si Bong Go nga makig-text ni Tomas. Makita man mismo sa mga post ni Tomas sa iyang mga text kang Bong Go nga hilabihan tag-asa, pero ang reply ni Bong Go mugbo ra man gyud kaayo.

Pero dili na angay lalison kun may koneksiyon ba o wala si Tomas sa Malacañang. Siyempre, siya gud ang mayor sa Cebu City. Maayo na lang kini kay nagpaubos na gyud si Tomas ug karon lang mga panahona nakig-alayon na kini sa Malacañang nga bisan gamay’ng problema sa peace and order nga mahimo ra sulbaron sa kapolisan dinhi, iya pa gyud nga gitug-an ngadto kang Presidente Duterte pinaagi kang Bong Go.

Apan usik-usik lang ang iyang text-text ngadto kang Bong Go kay wala man pasurendera ngadto kaniya si David Jr. Usa nga tan-awonon kun wala ba makadaot sa police operations ang iyang pag-post sa mga lokasyon sa kapolisan samtang naggukod kang David Jr. Maayong tan-awon kini kun tungod sa iyang mga post sa Facebook, wala ba makabantay si David Jr.

Karon nga mitahan na si David Jr. sa kapolisan, angayan niyang tubagon ang iyang pagpusil sa nurse nga si Ephraim Nuñal. Mentras wala pa’y areglo nga nahitabo, angayang taralon si David Jr. sa hukmanan. Niini mapakita nga walay adunahan o kabus sa hustisya.