Gustong dad-on sa inahan ang anak sa gawas sa nasud

Dear Atty. Divine,

May pangutana ko labot sa akong anak nga illegitimate. Ang amahan niining bataa, usa ka foreigner ug sa dihang nabuntis ko, wa na kini siya magpakita nako ug wa gani siya magsuporta sa bata sukad sa pagkatawo. Karong bag-o kalit lang nga mitunga ang akong boyfriend nga foreigner ug mi-demand nga gusto siya nga makakita sa bata. Ako siyang gitugotan nga makakita sa bata nga karon 3-year old na. Ako siya nga gisultian nga kinahanglan siyang mosuporta sa bata, ilabi na kay wa ko’y trabaho ug nagsalig lang ko sa suporta sa akong bana nga usa sab ka foreigner. Mi-demand sab siya nga hatagan siya’g panahon nga makauban ang bata, ilabi na kun ania siya sa Cebu. Apan plano nako karon nga dad-on ang bata sa gawas kay gipetisyonan man ako sa akong bana. Ang akong pangutana, mahimo ba nako nga madala ang bata? Unsay angayan nako nga buhaton? — Jessa

Dear Jessa,

Ubos sa atong Family Code, kun ang bata illegitimate, ang inahan sa bata mao gyud ang dunay katungod nga mo-custody niini. Apan karon nga mitunga na ang amahan, kinahanglan sab nga dili nimo siya hikawan sa iyang katungod nga makakita sa bata ug angay lang nga mo-demand ka niya og suporta para sa bata. Apan ang  katungod sa custody sa bata magpabilin gyud diha kanimo ug dili makapanghilabot ang amahan niini gawas lang kun aduna siya’y court order.

Samtang labot sa imong plano nga dad-on nimo ang bata sa gawas, mahimo nimo siyang dad-on ug iapil sa petition sa imong bana, apan posible sab nga pangayoan ka sa ilang immigration og consent gikan sa amahan inig-process nimo sa papers. Kun ugaling maglisud ka sa pagkuha og consent sa amahan sa bata, mahimo ka nga modangop sa DSWD aron sa pagpangayo og certification nga anaa sa imong Sole Custody ang bata ug mao kana ang imong i-submit ngadto kanila. - Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.