Gumikan sa subsob nga information drive sa kabomberohan kabahin sa fire safety, 13 lang ka sunog ang nahitabo gikan sa Marso 1 ngadto sa Marso 10. Ubos kaayo ni nga insidente sa sunog kun atong itandi sa susama nga mga petsa kaniadtong miaging tuig.
Nakatabang pud siguro ang dili kaayo init nga panahon, apan ang labing mahinungdanon mao ang walay puas nga pagpasiugda og “house to house” nga fire prevention campaign.
Nalipay kaayo ang kabomberohan kay matag bisita namo sa kabarangayan daghan na kaayo ang motambong sa mga fire safety lectures and seminars ug aktibo na kini nga mangutana ug manginlabot.
Mao kana nga batasan ang atong gipangita sa publiko aron hingpit kitang mahimong luwas sa sunog. Ang matag indibidwal dunay responsibilidad sa fire safety ug fire prevention.
Dako usab og ikatabang ang social media sa pagpasabwag namo sa among mensahe alang sa kamahinungdanon sa fire safety kay dali kaayong makakatap ang daghang kalihukan sa Bureau of Fire Protection sa pag-obserbar nato sa Fire Prevention Month karong bulana.
Aron kamo ma-updated sa activities sa inyong kabomberohan, pangitaa lang ninyo ang Facebook account sa fire station nga naa sa inyong lugar aron makita ninyo ang mga kalihukan niini.
* * *
Gihimo gahapon ang drawing, essay writing contest ug singing contest didto sa Robinsons Galleria. Gisalmotan ang maong indigay sa mga estudyante sa nagkalainlaing tunghaan sa Central Visayas.
Gituyo ang maong contest aron ma-involve ang atong kabataan sa fire safety ug mahibalo na kini sa kamahinungdanon niini. Kadtong nakadaog sa maong contest maoy ipadala sa kaulohan aron morepresentar sa Region-7 alang sa national competition.
* * *
Sa katapusan, migawas na ang order gikan sa Department of Interior and Local Government (DILG) pinirmahan ni Secretary Ismael Sueno nga naghimo na gyud ni Fire Senior Supt. Samuel Tadeo nga regional director sa BFP-7 gikan sa iyang pagka Officer-In-Charge sa nilabay’ng unom ka buwan.
Congratulations Sir Tadeo! FO3 Wendell C. Villanueva, BFP