EDITORYAL - May gikahadlokan

Walay molalis nga mas daghan gyud sa katawhan ang gusto nga ibalik ang pagpahamtang og silot nga kamatayon alang niadtong makahimo og bangis kaayong krimen, apil ang dinagkong pagpangawat sa kuwarta sa kagamhanan. Apan unsa’y gihimo sa mga kongresista?

Gipasar nila sa Kongreso ang death penalty apan alang ra sa mga makonbikto sa pagpayuhot og ilegal nga drugas. Walay mosupak nga silotan og kamatayon ang mga pushers, ilabi na ang mga drug lord, apan nganong wala ilakip sa masilotan og kamatayon ang makahimo og pagpanglugos og mga babaye, ilabi na mga bata, ug pagpangawkaw og dinagkong kantidad gikan sa kuwarta sa gobiyerno?

Masabot ba nga nahadlok ang mga magbabalaod nga iapil ang kasong Plunder kay basin og maunay unya sila sa balaod nga ilang gipanday? Ang silot nga pagkabilanggo sa tibuok kinabuhi wala gayud makapahadlok sa mga tawo sa pagpanglugos sa atong kababayen-an.

Ngano nga ang death penalty law gitumong ra man gyud sa makahimo og kalapasan sa balaod sa drugas? Wala ba diay mahuna-huna sa mga magbabalaod nga tungod sa grabeng pagpangawat sa kuwarta sa kagamhanan, wala gayud molambo ang atong nasud ug ang nabulahan kadto ra nga mga opisyal nga kawatan?

Daghan sa mga kongresista, duna gani taga Sugbo, apan ingon sila sa nabuta nga wala makakita sa panginahanglan nga angay’ng mahadlok ang katawhan sa pagpanglugos sa kababayen-an nga sama kanila pinaagi sa paglakip sa kaso nga Rape diha sa death penalty law.

Klaro kaayo nga ang kadaghanan sa mga kongresista nahadlok ra sa hulga sa labaw’ng opisyal sa Kongreso nga kadtong dili mosuporta pagpalabang sa death penalty law, hukasan sa ilang katungdanan pagka tsirman sa lainlaing komitiba ug ubang mahinungdanong katungdanan.

Dili rason nga ipasar usa ang death penalty law nga magbalik sa silot nga kamatayon, ug himoan lang kini og kausaban sa paglabay sa katuigan.