Aron makatulog dayon (2)

Sumpay sa ulahi nato nga nahisgutan mao ang unang opsiyon nga buhaton sa tulo ka ‘ingredients’, nga ibutang sa sudlanan ang ‘virgin coco oil’ ug ang ’raw honey’ nga kutawon, dayon idugang ang ‘rock salt’. Moinom niini og usa ka kutsara nga dunganan og tubig, sa dili pa matulog.

Ania ang ikaduha nga opsiyon, kun magsige ka’g mata-mata sa kagabhion, puwede moinom gihapon niini kay human sa 30 minutos makatulog ka’g balik. Ngano nga kita makatulog niini? Kay ang ‘coco fats’ sa ‘coco virgin oil’, maghatag ni og igo nga enerhiya sa tibuok gabii nga mahinanukon sa pagtulog sa lawom nga kagabhion.

Maingon man, mosanta kini sa pagsaka sa lebel sa ‘blood sugar.’ Pinaagi sa ‘raw honey’, sagad mao ni ang hinungdan nga dili ta makatulog. Mohatag sab ni’g igo nga pundo sa atay nga ‘glycogen’ alang sa utok nga ikalma ang stress, ang ipagawas niini sa adrenal glands, ang stress nga nakapabug-at sa hunahuna.

Hasta ang asin (rock salt), moabag sab kini sa pagpaubos o pakalma sa stress hormones. Ang nahisgutan nga tulo ka ‘ingredients’, nagtinabangay kini sa pagpahuyang nga kapugngan ang pagtigum og stress hormones ug mopalig-on sa enerhiya, sa tuyo aron kita makatulog, makapahulay ug maayo nga pagkahinanok. Ang kakulang sa asin, mopalambo sa grabeng stress hormones.

Tungod niini dili nato taligam-an ang pagtagad dayon ning problemaha sa dili pa makatulog kay delikado kini nga masawod sa sakit nga insomnia, hangtod mograbe sama sa sleep apnea. Seryoso nga sakit kini nga sa pagtulog maglisud na kita usahay sa pagginhawa, nga momugna’g dagha’ng kakulian sa panglawas sama sa diabetes, hayblad presyur, atake, depresyon, pirme maglabad ang ulo, gikabuhi ug problema sa baga o sa  sistema sa respiratory.