Daghan pa nga pangremedyo sa ngipon nga nagsakit. Tingali igo na kini nga makahatag og mga ideya aron pag-alibyo sa kahasol kun magngulngol na sa kasakit ang atong ngipon. Ania pa’y dugang pang-alibyo sa ngipon nga nagsakit, sama niining mosunod;
* Whisky o brandy —Kanang imnonon nga alcoholic. Magkuha ka’g cotton ball o binola nga gapas, ihumol ni sa whisky o brandy, dayon ipaslak sa lungag sa ngipon nga nagsakit.
Dili magtagay kay delikado nga mahubog, hinuon mawala man ang kasakit sa ngipon apan mayabag sab ang utok.
* Ginger (luy-a) — Pagsagol og pinulbos nga luy-a ug cayenne (sili), butangi’g gamay’ng tubig nga igong mapasta. Dayon paslaki niini ang lungag sa ngipon nga nagsakit, dayon sapawi og paslak sa uga nga gapas. Ang sili epektibo kini nga makapakalma sa sakit.
* Olive oil — Ituslob ang binolang gapas (cotton ball) sa lana sa oliva, dayon ipaslak ni sa bangag sa ngipon nga nagsakit. Buhata ni duha o tulo ka beses sa adlaw, aron mohupay ang kangulngol sa ngipon. Ang pag-alibyo, gumikan kini sa ‘phenolic compound’ sa olive oil.
* Onion (sibuyas Bombay) — Paghiwa’g gamay unya pinoha pagtadtad nga direkta butangan ang bangag sa nagsakit nga ngipon. Pipila ka minutos mokalma ang kangulngol niini nga makasiak sa ulo.
* Warm salt water — Ang usa ka kutsarita sa asin, ikutaw sa usa ka baso nga tubig-init, dayon ilimugmog kini sa igong maagwanta nga kainit. Buhata ni tulo ngadto sa upat ka beses sa adlaw.
* Garlic (ahos) —Paslaki’g ahos nga may asin ang lungag sa ngipon nga nagsakit.