Lumba sa charging
Pabiling pakyas ang higanteng mga kompaniya sa telepono sa pagsulbad sa labing dakong limitasyon sa smart phones, kun itandi sa unang henerasyon sa cell phones mao ang kadali ra nga mabasiyo sa batereya.
Mas taas og lahutay ang karaang mga telepono kay tawag ug text ra may mahimo. Mas paspas nga moawop ang bag-ong mga telepono tungod sa mas mabulukong touchscreens ug mas dagko ug paspas nga mga himan.
Bisan giunsa nila og paningkamot, wa molampos ang mga eksperto pagmugna og bag-ong mga batereya nga makalahutay sa tibuok adlaw. Mao nga nitahan na lang ug nitingob sa ilang pagtukaw sa paghimong mas paspas sa charging sa mga baterya.
* * *
Napandol kining bag-ong lumba sa niaging tuig tungod sa makauuwaw’ng eskandalo nga nahiaguman sa labing dakong kompaniya sa telepono karon sa tibuok kalibutan, ang Samsung: Ang pag-ulbo sa mas gamhanan nga mga batereya sa ilang labing bag-ong telepono.
Human sa pagkamugna sa Quick Charge 1.0 niadtong 2013, nga 40% nga mas paspas sa charging sa mga batereya, gitakdang ipasukip sa smart phones nga manggawas karong tuiga ang gipasalig nga mas paspas pa gyud apan luwas nga Quick Charge 4.0.
* * *
Duha ka managlahi nga teknolohiya ang gipaabot nga modominar sa pagtubag sa kahigwaos sa mga konsumidor sa quick charging sa smart phones:
Ang Quick Charge 4.0, nga mosubay sa USB-C standard (nga gipalabi sa Google, ang nagmugna sa Android), nipasalig nga makahatag na og lima ka oras nga kinabuhi sa batereya ang lima lang ka gutlo nga charging; ug
Ang Dash Charge, nga dili mogamit sa mas taas nga boltahe nga mopainit sa telepono, kun dili sa mas taas nga current nga charger ra’y moinit apan mopabiling bugnaw sa telepono, nigarantiya nga ang 30 ka gutlo nga charging makapalahutay na sa batereya sa tibuok adlaw.
* * *
Gipasidan-an hinuon ang mga konsumidor sa dili pagpalingla sa mga numero kay ang charging mas paspas kun mabasiyo ang baterya, apan kon moabot na og 60% pataas mas hinay na ang charging.
Wa moapil sa lumba sa pinaspasay sa charging ang Apple nga igo lang nipasalig nga ang ilang iPhone 8 nga ipagawas sa mosunod nga mga buwan ma-charge nga wa na’y kable.
- Latest
