EDITORYAL - Katalagman nga dili matagna

Sa makausa pa, panahon karon sa mga Filipino nga maghiusa atubangan niining katalagman nga mugna sa 6.7 magnitude nga linog nga niigo sa Surigao del Norte nga nikalas og daghang kinabuhi, ug niguba sa daghang inprastraktura nga posibleng mokantidad og bilyones ka pesos.

Dugang kini nga pasakit ug pas-anong kalisod sa atong kaigsuonan nga nanimuyo didto sa dapit nga naapektohan. Makiangayon lang nga ang katawhang Filipino mag-ampo alang sa paspas nilang pagbarug gikan sa kalamidad.

Ang Phivolcs miingon nga ang sentro sa maong linog nahimutang 14 ka kilometros sa amihanang-kasadpan gikan sa Kapitolyo sa Surigao ug may gilawmon lang nga 11 ka kilometros. Gikan sa pag-igo niini 10:03 sa gabii niadtong Biyernes, ang Phivolcs nakatala na og kapin 100 ka aftershocks.

Sa pagkakaron, ang gobiyerno nagkara-kara sa pagpadala og mga hinabang ngadto sa mga naapektohan, ilabi na sa panginahanglan og pagkaon ug limpyo nga tubig nga mainom.

  Ang linog dili sama sa bagyo nga ma-monitor samtang nagpadulong sa usa ka lugar, busa wa’y maayong laki niini. Bugtong mahimo lang sa katawhan mao ang pagtamod sa mga palisiya sa gobiyerno sama sa hustong pagtukod og balay o mga buildings sa mga dapit nga dili peligrong agianan sa linog o pagtay-og sa yuta.

Laing timan-an ug kinahanglang sundon mao ang pagsunod sa desensyo sa mga edipisyo nga giisip na karon nga earthquake proof alang sa kaluwasan sa mga magpuyo niini, kun aduna may linog nga mahitabo.

Ang linog nabatyagan usab sa Mandaue City; San Ricardo, Limasawa ug San Francisco, Southern Leyte nga miabot og Intensity 4. Apan wala kini gibilin nga kadat dinhi sa Kabisay-an. Dinhing dapita, kanunay’ng magkahiusa ang mga Filipino panahon sa kalisod, bisan sa daghang mga deperensya sa mga baruganan ug pagtoo.