Sa ato na nga gihisgotan dinhi, sa America, isip counterpart sa atong mga kahugpongan sa senior citizens dinhi sa atong nasud, aduna sila’y AARP, kon American Association of Retired Persons, mga retirado gikan sa panarbaho, bisan kun dili pa senior citizen.
Pagkakaron, sumala sa atong nasayran, kapin na sa 42 milyones ang ilang membership. Apan, lahi dinhi sa atong nasud, kay nag-iyahay kita, daghan kaayong individual nga mga pundok-pundok, kay lagi, kitang tanan gusto nga mag-presidente.
Sila didto usa ra. Ug sa ato na nga giingon dinhi, giisip nga usa sila sa labing influential nga grupo sa America, one of the most influential lobby groups in the States.
Ug tungod kay usa ra sila, inigtingog nila, mokurog ug paminawon gyud sila sa gobiyerno. Tiaw mo nga 42 milyones ka retirees, nagkahiusa. Lanog ug makabungol ang ilang tingog.
Dinhi sa ato, unsa man? Wala kita’y tingog as one potent group sa mga senior citizen. We are about 7 to 8 million senior citizens in the country. Apan, wala kita’y tingog. Maghuwat lang unsay itunol nganhi kanato.
May gitukod unta nga FSCAP, kon Federation of Senior Citizen Associations of the Philippines, nationwide unta nga kahugpongan sa nagkalainlaing pundok sa mga senior citizen sa tibuok nasud. Apan, wala kadto maka-unite sa tanang senior citizens sa tibuok nasud. Nag-iyahay gihapon kita.
Ug wala kita’y nadungog nga tingog gikan kanila sa mga higayon nga adunay mga isyu nga may kalabutan sa mga concerns sa senior citizens. Mga pamahayag nga magdala unta sa tingog sa tanang senior citizens sa tibuok nasud, hinungdan nga karon bahin sa isyu sa pag-usbaw sa atong pension, wala kita madungog og baruganan gikan sa mga senior citizen.
Diha kadto’y mga tinugyanan o mga Kongresista sa Senior Citizen Party-list, apan wala sila’y nahimo nga kaayohan kanato nga mga senior citizen sa tibuok nasud.
Gani, ang nangamahan sa balaod pagpausbaw sa atong pension sila man si kanhi Kongresista Neri Colmenares ug iyang mga kauban sa Bayan Muna Party-list.
Hangtod karon, sila gihapon ang nagtikaw-tikaw ug nangusog nga ang P2,000 nga usbaw sa pension dili makapabangkaruta sa SSS. Ilang sugyot nga tarungon lang ang management sa SSS.
Improve its collection efficiency, nga pagkakaron adunay P325 bilyones nga collectible; ipahimutang sa hustong investments ang salapi niini; ug menosan ang subra nilang mga gasto, ilabina ang dagko nila nga mga sweldo ug allowances.
Hain na man ang tingog sa mga senior citizens?