Sibaw kaayo karon ang tinguha sa Malacañang nga ibalik ang Reserve Officers Training Corps ug himuon pa gyud nga mandatory, apan miani dayon og pagsaway gikan sa mga grupo nga kaniadto pa, dili gyud gusto niini.
Niadtong tuig 2001, gipahunong ang ROTC tungod sa mga kontrobersiya sa kurapsyon ug hazing sa mga kadete. Gihimo kining rason sa mga dili gyud ganahan nga magmartsa-martsa sa init aron lang kini mawagtang.
Dili ikalimod nga aduna gyuy mga pagpangawkaw ug abuso sa ROTC sukad nga naporma kini niadtong 1912, ug niadto lang 2001 nahunong. Gimugna ang Republic Act 9163, o ang “National Service Training Program (NSTP) Act of 2001 isip alternatibong kapilian sa mga estudyante.
Husto ba nga pasanginlan ang ROTC program kun kurapsyon ug abuso ang hisgotan? Wa diay kurapsyon ug abuso sa gobiyerno? Kun abuso ang hisgotan, wala na lang diay kwenta ang abuso nga gipanghimo sa nga sundalo, polis, konstabularya ug uban pa nga ahensiya sa gobiyerno ngadto sa mga sibilyan?
Maayo ang tumong sa ROTC. Duha ka labing importanteng hiyas ang makat-onan gikan niini -- ang disiplina ug pagmahal sa nasud. Pinaagi sa ROTC, kanunay nga adunay nakaandam nga reserbang sundalo ang Pilipinas; tinubdan usab kini sa mga disiplinado ug organisadong kabataan nga makatabang kun may kalamidad. Gawas pa niana, sukad pa kaniadto ug hangtod karon, ang kadaghanan sa mga opisyal sa AFP produkto sa ROTC ug ikaduha lang ang gikan sa Philippine Military Academy.
Apan aron mas ganahan ang kabataan pagsulod niini ug mopadayon sa ilang karera isip mga opisyal sa AFP, kinahanglang balikan pagtan-aw ang Republic Act 7077, o ang “Citizen Armed Forces of the Philippines Reservist Act.”
Kini aron mapahaom sa modernong sitwasyon kun wagtangon ba, o pun-an ba, aron ang mga buslot nga maoy hinungdan sa kurapsiyon ug pagpangabuso dili na masubli.